کرتارپور راہداری ءِ ملنگ آن مچ آدنیا پاکستان و بھارت اٹی اقلیت آتون برتاءوءِ خنا، سینیٹر فیصل جاوید

اسلام آباد ۔ 11نومبر (اے پی پی) پاکستان تحریک انصاف نا راہشون سینیٹر فیصل جاوید پارینے کہ کرتارپور راہداری ءِ ملنگ آن مچ آ دنیا پاکستان و بھارت اٹی اقلیت آتون برتاءوءِ خنانو، اوکان پد بھارت نا اصل دروشم مچ آ دنیا نا مون آ پاش مسنے ۔ نجی ٹی وی چینل تون گپ کرسا اوپارے کہ بھارت اٹی انتہاپسندی، بنداوی انسانی حق و اقلیت آتا حق ءِ خلنگ انگ ءِ ایلو کنڈ پاکستان تینا اقلیت آتون گچین برتاءو کیک ۔ سینیٹر فیصل جاوید مستی پارے کہ کرتارپور راہداری ءِ ملنگ آن مچ آ دنیا پاکستان نا دروشم ءِ خنانے، بھارت خار تیا مبنی سیاست کیک، مودی و آر ایس ایس نا سوچ مچ آ دنیانا مون آ پاش مسنے ۔ کرتارپور راہداری ءِ ملنگ پاکستان نا زبردست ءُ گام گیج اسے ہراڑان مچ آ دنیا ٹی پاکستان ءِ پزیرائی ملانے خاص وڑاٹ سکھ برادری نا کنڈآن ہرا مچ آ دنیا ٹی پاکستان نا سفیر مسنے و پاکستان نا امن نا کلہو ءِ مون آ دننگ ءِ ۔ اوپارے کہ مودی نا انتہاپسندی نا برخلاف بھارت اٹی مہالو ہم ہیت کننگاکہ و داسہ ہرا ڈل پاکستان آ بسنے او داڑے خلقت تون ہم ملنگ ءُ ، و تینا خن تے اٹ خننگ ءُ کہ پاکستان اٹی اقلیت آتون ہراوڑنا برتاءوکننگک و دانا برعکس بھارت اٹی اقلیت آتون انت مننگ ءِ ۔ اوپارے کہ دوقومی نظریہ بالکل درست ثابت مسنے ۔ سینیٹر فیصل جاوید کشمیر نا معاملہ غا ہیت کرسا پارے کہ پاکستان دا ویل ءِ تالان کننگ کن اسہ فورم اسے ہم گوجالتنے ہراٹی جہانی برادری دا ویل انا سنگینی آن معلومدار مرسا کشمیری تا مخ تفی ٹی ہیت کننگ ءِ ۔ 50 سال اٹی اولیکو وار امریکی کانگریس نا فارن آفیر کمیٹی ٹی ہم کشمیر نا معاملہ غا شرہ مسنے ہراٹی کشمیر اٹی کرفیو ءِ ہرفنگ نا ہیت کننگانے ۔ اوپارے کہ بروک آ دے تیٹی نمے معلوم مریک کہ مچ آ دنیا کشمیر نا ویل آ پاکستان نا ہم توار ءِ ۔