خواجہ ﷺ نا رغاموک آتیا عمل کرسا گچین زند و آخرت نا مزل آتے آسان کننگ مریک، بنجائی وزیر نور الحق قادری

مقبوضہ کشمیر اٹی خواجہ ﷺ نا پن ءِ ہلنگ نا سوب آن خلقت نا لس خون ءِ کننگ انگ ءِ، صدر آزاد کشمیر

خواجہ ﷺ نا اصول آتیا عمل نا کمک اٹ راجی برائی تے چٹفنگ مریک ، پیر حسان حسیب الرحمان نا عئید گاہ شریف اٹی میلاد نا دود آن تران

راولپنڈی ۔ 11نومبر (اے پی پی) صدر آزاد کشمیر سردار مسعود خان پارینے کہ خواجہ ﷺ رہبر انسانیت ئس ۔ خواجہ ﷺ دنیا ءِ قیامت اسکان کن کانود اس تس ۔ داخیال آتا درشانی ءِ اوفک یک شنبے نادے آ عئید گاہ شریف اٹی اڈ ہلوک آ عید میلا دالنبی ﷺ نا دود آن تران کرسا کریر ۔ داوخت آ بنجائی وزیر مذہبی امور نور الحق قادری ، سجادہ نشین آستانہ عالیہ عئید گاہ شریف پیر محمد نقیب الرحمان، سجادہ نشین دربار عالیہ محمد یہ عئید گاہ شریف پیر محمد حسان حسیب الرحمان ، پارلیمانی سیکرٹری شیخ راشد شفیق، پیر سید حبیب اللہ شاہ ، پیر نور الحق قادری، پیر دیوان احمد مسعود، پیر سید ریاض حسین شاہ ، پیر سعادت علی ، و ایلوسیاسی ، مذہبی راہشونک، ثناخوان آتون اوار بھلو کچ اسے ٹی عقیدت مند آک ساڑی ئسر ۔ سردار مسعود خان پارے کہ اسوہ حسنہ نا پیروریءِ کپننگ آ مچ آ دنیا ٹی مسلمانک مشکل آتا گواچی ءُ ۔ اوپارے کہ دین اسلام بیرہ مکہ یا مدینہ اسکان محدود سلتنے بلکن کرہ ارض انا ہر ڈیہہ ٹی اسلام نا پن ءِ ہلنگک ۔ خواجہ ﷺ نا پیر وری ءِ کرسا پاکستان و آزاد کشمیر ءِ اسہ سوگو ءُ ریاست اس جوڑ کینہ ، مقبوضہ کشمیر ءِ ہندوستان نا دُوتیان آجو کرفنہ ۔ اوپارے کہ مقبوضہ کشمیر اٹی خواجہ ﷺ نا پن ءِ ہلنگ نا سوب آن خلقت نا لس خون ءِ کننگ انگ ءِ و اوفتے قید خانہ غاتے ٹی بند کننگک ۔ داوخت آ بنجائی وزیر مذہبی امور نور الحق قادری پارے کہ حکومتی عہدہ عارضی مریک و حکومت آک ہم بدل مرسا کیرہ و بزرگان دین ءِ خواجہ ﷺ تون مہر و مریبت و عقیدت نا رتبہ ءِ اسہ حکومت اس ہم تتو بلکن اللہ پارینے نما ذکر ءِ ای بلند کرینٹ داذکر ءِ ہراسٹ کپک او دنیا و آخرت اٹی ذلیل و رسوا مریک و کنا آزموندہ ءِ کہ ہرا خواجہ ﷺ نا یات اٹی وابستہ مریک کہ اللہ تعالیٰ اودے ابدی حیات و زند اس عطاکیک ۔ ہراخلقت اللہ تبارک و تعالیٰ غان پد خواجہ ﷺ نا ذکر اٹی اختہ مریرہ اوفتے ہڑتوم آ جہان اٹی سرسہبی ملک ۔ دود آن تران کرسا سجادہ نشین دربار عالیہ محمد یہ عئید گاہ شریف پیر محمد حسان حسیب الرحمان خواجہ ﷺ نا زند ءِ مون آ تخا و پارے کہ دنیا و آخرت اٹی حقی سرسہبی خواجہ ﷺ نا رُغاموک آ تیا عمل کرسا ہی دوئی کننگ مریک ۔ اوپارے کہ خواجہ ﷺ نا رغاموک آتیا عمل کرسا غٹ راجی برائی تے چٹفنگ مریک و شونہال زند اس تیر کننگ مریک ۔ دود انا ایسر آ سجادہ نشین آستانہ عالیہ عئید گاہ شریف پیر محمد نقیب الرحمان پاک فوج و ملکی سلامتی کن دعا کرے ۔