اسلام آباد ۔ 11نومبر (اے پی پی) بنجائی وزیر انسانی حق ڈاکٹر شیریں مزاری پارینے کہ اقوام متحدہ مقبوضہ کشمیر اٹی بھارتی بیدادی نا نوٹس ءِ ہلے، 5 اگست آن پد آن داوخت اسکان کوزہ گر فوج 144کم سن چناتے دزگیر کرینے، اقوام متحدہ نا سلامتی کونسل نا زمواری ءِ کہ او مقبوضہ کشمیر اٹی کشمیری تا خون و بیدادی نا واقعہ غاتے مون آ تخسا دمدستی نیام تمے ۔ دوشنبے نادے آ داڑے ’’اے پی پی‘‘ تون گپ و تران کرسا ڈاکٹر شریں مزاری پارے کہ مقبوضہ کشمیر اٹی 5اگست آن پد آن داوخت اسکان کوزہ گر فوج و پولیس 9 سالہ چناتے تون اوار 144کم سن چناتے دزگیر کرینو، بھارتی حکومت کشمیر نا متنازع حیثیت ءِ چٹفینے و پدریسہ کرفیو خلکونے ہرانا بابت عدالت نا کنڈآن مقرر کروک کمیٹی ہم تینا رپورٹ اٹی داواقعہ غاتے پک کرینے ۔ اوپارے کہ مقبوضہ کشمیر اٹی ہزار آ چناتے بیہمانہ بیدادی نا نشانہ جوڑ کننگ انگ ءِ ، انسانی حق انا سرگرم کشمیری تنظیم تا کارندہ غاتا رداٹ 5 اگست آن 13 ہزار کم سن مارتے دزگیر کننگانے و اوفتے بیدادی نا نشانہ کننگ انگ ءِ ۔ ڈاکٹر شیریں مزاری پارے کہ بھاز انگا کانودی جواز ساڑی ءِ ہرا کشمیر نا بابت پاکستان ناموقف نا نئے بیرہ مخ تفی ءِ کیرہ بلکن بھارتی بیانیہ نا نفی ءِ ہم کیرہ ۔ اوپارے کہ دا اقوام متحدہ نا ادارہ یونیسیف نا ہم زمواری ءِ کہ او دا بیدادی تا نوٹس ءِ ہلے و بھارتی کوزہ گر فوج انا کنڈآن چناتیا ظلم و بربریت ءِ بند کرفے ۔ اوپارے کہ اقوام متحدہ نا سلامتی نا غٹ 5باسک داحالیت آتیا خاموشی اختیار کرینو ہرا بے کچ مایوس کن و قابل مذمت ءِ عمل اسے ۔
