وزیراعظم عمران خان سیٹیزن پورٹل آکروک آ غاوتا تاخیر نا نوٹس ءِ ہلک، غٹ وزارت آتے تعلقدار آفیسر آتا کارکڑدگی نا جاچ ءِ ہلنگ کن کمیٹی اس ٹہیفنگ نا پارت

اسلام آباد ۔ 11نومبر (اے پی پی) وزیراعظم عمران خان پاکستان سیٹیزن پورٹل آ شاری تا کنڈآن نوشتہ غاوتے جوڑ کروک وڑوڈول نا رداٹ چٹفپننگ و ایسر کننگ اٹ تاخیر نا نوٹس ءِ ہلسا غٹ وزارت آتے پارت کرینے کہ تعلقدار آفیسر آتا کارکڑدگی نا جاچ ءِ ہلنگ کن اسہ کمیٹی اس ٹہیفنگے ۔ وزیراعظم دفتر نا کنڈآن غٹ وزارت و ڈویژن آتے نوشتہ کروک مراسلہ نا رداٹ منہ آفیسر آتا کارکڑدگی نا جاچ ءِ ہلنگ آن پد دا ہیت انا پت پاش مسنے کہ غاوتے نئے جوڑ کروک وڑوڈول نا رداٹ چٹفنگا و نئے مناسب کہول آ اوفتا ازالہ کن فیصلہ اس کننگا ۔ مراسلہ ٹی پاننگانے کہ غاو تا ازالہ کن شاری تے تروک آ ردعمل نا آب آن دا ثابت مس کہ مچ آ نظام ءِ ماتحت عملہ نا رحم وکرم آ ہلنگا ہرافک زیات تر فیصلہ ہم کریر ۔ کمیٹی نا چیئرمین گریڈ 20 انا آفیسر اس مریک ، 4پین آفیسر کمیٹی نا باسک مریرہ ۔ کمیٹی چندی ادارہ غاتا گچین مروک آفیسر آتا کارکڑدگی و غاو تا ایسر اٹی اڑاند آتا جاچ ءِ ہلسا ایسر اس تجویز کیک ۔ کمیٹی آفیسر آتا گچین یا خراب کارکڑدگی نا بابت معلومدار کیک ۔ کمیٹی سیٹیزن پورٹل نا کمک اٹ غاو تا ایسری نا بابت سرسہبی نا تناسب ءِ ہم تالان کیک ۔ وزارت و ڈویژن آتے غاوتا جاچ رپورٹ کن 30 دے انا مہلت تسنے ۔ وزیراعظم دفتر نا کنڈآن پیدواری کننگانے کہ شاری تے ازالہ نا بابت شاہدی فراوان کننگ آ زور شاغنگ آن پد ہم بھاز انگا ایسر مروک غاوک داکان بیدس خننگار ۔ غاوتے غلط درخواست آتیا ہلنگا و بھاز انگا ایلوفتے غیر تعلقدار یا غیر مجاز کہول آ چٹفنگا ۔ جاچ اٹی داہم خننگانے کہ شاری تے پاننگانے کہ اوفتے ریلیف یا جزوی ریلیف تننگانے ولے حقیقت اٹ حالیت آک داکان چپ ئسر و غاوتا ازالہ نا بابت غلط بیانی اٹ کاریم ہلنگا ۔