چین پاکستان تون آزاد واپار نا معاہدہ ءِ وخت آن مست فعال کننگ نا منظوری ءِ تسنے، وزیراعظم نا سلاہکار واپار صنعت و پیداوار عبدالرزاق داءود نا پریس کانفرنس آن تران

اسلام آباد ۔ 08 نومبر (اے پی پی) وزیراعظم نا سلاہکار واپار صنعت و پیداوار و ٹیکسٹائل انڈسٹری عبدالرزاق داءود پارینے کہ چین پاکستان تون آزاد واپار نا معاہدہ ءِ وخت آن مست فعال کننگ نامنظوری ءِ تسنے، معاہدہ یکم دسمبر آن فعال مریک، ڈیوٹی فری مصنوعات برآمد کننگ مریک، چندی جہانی کمپنی تے قائل کننگ اُن کہ او پاکستان اٹی دُوارہ برسا واپار کیر ۔ جمعہ نادے آداڑے پریس کانفرنس آن تران کرسا عبدالرزاق داءو پارینے کہ پاکستان و چین نا نیام اٹ آزاد واپار نا معاہدہ غا اپریل اٹی دستخط مسوسس و آزاد واپار نا معاہدہ ءِ فعال مننگ کن اسہ سال انا وخت درکار مریک ، ولے چین آزاد واپار نا معاہدہ ءِ وخت آن مست فعال کننگ نا منظوری ءِ تسنے، آزاد واپار نا معاہدہ یکم دسمبر آن فعال مریک ۔ چینی سرکڑدہ غاک پارینو کہ پاکستان تون ننا خصوصی تعلقداریک ءُ ۔ اوپارے کہ دوشنبے آن لاہور اٹی جہانی نمائش بناکننگ ءِ ہراٹی چین نا 36کمپنی ہم بشخ ہلیرہ ۔ اوپارے کہ آزاد واپار نا معاہدہ غان پاکستان نا واپاری بندغ آتے کن درگہ غاک ملنگانو و چین ءِ ٹیکسٹائل ، سل، ازباب جراحی، کیمیکلز ، دوائی تتون اوار غٹ مصنوعات آتے برآمد کننگ مریک داسہ کاروباری بندغ آک داڑان بایدے فائدہ ہرفر ۔ اوپارے کہ چندی جہانی کمپنی تے قائل کننگ اُن کہ او دُوارہ پاکستان آ بریر واپار کیر ۔ چندی چینی کمپنی کراچی، لاہور و فیصل آباد اٹی زرکاری کننگ ءُ، آزاد واپار نا معاہدہ ٹی مصنوعات آتا ڈیوٹی فری رسینگ آن پاکستان نا برآمد آتے ٹی ہم ودکی مریک ۔