وزیر دفاع پرویز خٹک نا قومی اسمبلی ٹی گپ و تران

اسلام آباد ۔ 08 نومبر (اے پی پی) وزیر دفاع پرویز خٹک پارینے کہ علی امین گنڈاپور مولانا فضل الرحمان ءِ الیکشن کننگ آ چیلنج کرینے، اگہ ہمت ارے تو مقابلہ کرسا نشان ایتے، اگہ دا آئین و جمہوریت نا پاسدار ءِ تو برے نن تون مذاکراتی میز آ تولے ہیت کے، اگہ دا پاہک کہ داوخت گزاری کننگ ءِ تو نن ہم اودے پانہ کہ نن ہم اوڑتون ٹائم پاس کننگ اُن، بے شک دھرنہ ایتے ولے پاکستان ءِ نسخان تف، اگہ دا پاکستان ءِ شونداری نا کسر آ روان کریرہ تو خلقت اوفتے مسترد کتوکہ، آئین اٹی آرڈیننس آتا کمک اٹ کانودسازی نا گنجائش ساڑی ءِ ۔ جمعہ نادے آ قومی اسمبلی ٹی خیال آتا درشانی ءِ کرسا وزیر دفاع پرویز خٹک پارے کہ کنے وزیراعظم مذاکراتی کمیٹی نا سروک جوڑ کرے و کنے اختیار تس کہ ای ہراسٹ ءِ چاو کمیٹی ٹی اوار کیو ، ای سپیکر، چیئرمین سینیٹ، اسپیکر پنجاب اسمبلی ءِ کمیٹی ٹی اوار کریٹ ۔ دانا سوب دائس کہ کنے کمکاری درکار ئس ، ای ہندن ءُ ٹیم اس جوڑ کننگ خواہاٹہ تانکہ اوفتے پت مرے کہ نن ویل انا ایسری ءِ خوانہ ۔ اوپارے کہ اینو دا جمہوریت و کانود نا ہیت ءِ کیرہ و ننے جمہوریت و کانود ہیل تننگ ءُ، ای ہر دور ءِ خنانٹ، ای اوفتا شکل ءِ خنسا پشیمان و شرمندہ اُٹ، ہنداخاطران وزارت ءِ ہلسا عمران خان تون اوار مسونٹ، ای خواہسوٹہ کہ ایماندار لیڈر اس برے و ہرا پاکستان ءِ بدل کے ۔ داہندن ءُ تاثر تننگ ءُ کہ ہراتم اوفک پاکستان ءِ ہلار تو پاکستان مالامال ئس، ملک معاشی لحاظ اٹ شون ہلککہ، رشوت ہلوکہ ، کرپشن ہلوکہ ۔ مولانا پاننگ ءِ کہ او الیکشن تے منپک ، انت دا اونا راج ءِ، نن ملک اکن قربانی تسونن ۔ اوفک تو پاکستان ءِ ہم امنا کتوس، اگہ دا جمہوری خلقت ءُ تو پیپلزپارٹی، اے این پی و مسلم لیگ (ن) ہنسا مولانا ءِ اتیر او داڑے ہیت کے، اگہ ملک ءِ چلیفوئی ءِ و جمہوریت ءِ منک تو مذاکرات نا میزآ برے ہیت کے ۔