صدر مملکت ڈاکٹر عارف علوی نا انٹرنیشنل یونین کانفرنس نا ایسری سیشن آن تران

اسلام آباد ۔ 08 نومبر (اے پی پی) قدرتی چاگڑد نا رکھ ننا غٹ انا فرض ءِ ، گلوبل وارمنگ نا خطرہ تون مون تننگ کن جہانی کہول آ اسیجا وڑاٹ کاریم کننگ نا گرج ءِ ، چاگڑد نا رکھ اکن ننے غٹ ءِ تینا کڑد ءِ ادا کروئی مریک ۔ صدر مملکت ڈاکٹر عارف علوی قدرتی چاگڑد نا رکھ انا بابت داڑے اڈ ہلوک آ ہفت می انٹرنیشنل یونین کانفرنس نا ایسری سیشن آن تران کرسا پارے کہ قدرتی چاگڑد نا رکھ اکن نن غٹ بایدے اواری اٹ کاریم کین ۔ اوپارے کہ دنیا نا آبادی ٹی پیدواری لاءخی تا تناسب آن ودکی نا گرج ءِ تانکہ الس نا گرج آتے پورو کننگ مرے ۔ اوپارے کہ انسان نا گرج آتے ٹی بیرہ خور ہی آخا بلکن ایلو آسراتیک ہم اوارءُ، داڑکن طلب و رسد اٹی بریبری بھاز المی ءِ ۔ چاگڑدی بدلی تا بابت صدر مملکت پارے کہ دا بدلی تا سوب آن پاکستان نا سمندری دنگ اٹی 60آن 70 درسد اسکان مچھیک چٹانو ہرا گڑتی نا قابل ءِ ۔ اوپارے کہ نن چاگڑدی رکھ انا کمک اٹ مچھی تا پیدوار و افزائش نسل اٹی بایدے ودکی کین ۔ ڈاکٹر عارف علوی پارے کہ ہراتم نن جہانی درجہ حرارت و چاگڑدی رکھ انا ہیت ءِ کینہ و دابابت انسانیت نا بنداوی گرج آتا ہیت ءِ کننگے تودادے بایدے ذہن اٹ تخنگے کہ انسانیت نا سیبو ایلو حیاتیات آٹے ہرافتے تینا گرج آتے پورو کننگ کن انسان کاریم اٹ اتیک ۔ اوپارے کہ تدوک آ منہ سال اٹی جہانی کہو ل آ سائنسدان قدرتی حیات نا چٹفنگ آ گڑتی نا درشانیءِ کننگ ءُ انتئے کہ قدرتی حیاتیات نا گڑاس وڑنا ناپید مننگ آن کشاری پیدوار ءِ بھاز خطرہ مون تروک ءِ اوپارے کہ دیر انا گچین کاریم اٹ اتنگ ہم اسہ اہم و جہانی ویل اس جوڑ مسنے ۔