وزیراعظم عمران خان نا کماشی ٹی ضرورت نا گڑاتا نہادآتے ٹی کمتی اتنگ و الس ءِ ریلیف فراوان کننگ نا بابت دیوان

اسلام آباد ۔ 08 نومبر (اے پی پی) وزیراعظم عمران خان نا کماشی ٹی ضرورت نا گڑاتا نہاد آتے ٹی کمتی اتنگ و الس ءِ ریلیف فراوان کننگ نا بابت جمعہ نا دے آ دیوان اس اڈ ہلک ۔ دیوان اٹی بنجائی وزیر ڈٹ بندی و شونداری مخدوم خسرو بختیار ، بنجائی وزیر مواصلات مراد سعید، وزیراعظم نا خصوصی کمکار راجی فلاح و بہبود ڈاکٹر ثانیہ نشتر، وزارت خزانہ ، ڈٹ بندی، مواصلات، نیشنل فوڈ سیکورٹی و صنعت نا سیکرٹری و ایڈیشنل سیکرٹری، چیئرمین و منیجنگ ڈائریکٹر یوٹیلٹی اسٹورز کارپوریشن ، چیف کمشنر اسلام آباد و ایلو سینئر آفیسر آک ساڑی ئسر ۔ دیوان اٹی وزیراعظم ءِ بنداوی ضرورت نا گڑا(نُت، سی، بورہ، برنج ودال) آتا نہاد آتا ساڑی حالیت و اوفتے ٹی کمتی اتنگ نا بابت گام گیج آتیا سرجم حوال تننگا ۔ چیئر مین و منیجنگ ڈائریکٹر یوٹیلیٹی اسٹورز کارپوریشن پارے کہ حکومت نا کنڈآن شش ارب روپئی دمدستی وڑاٹ فراوان کننگ آن بنداوی المی گڑاتے ٹی پیدوار کمتی اتنگ مریک ۔ دیوان اٹی وزیراعظم ءِ پاننگاکہ حکومت نا کنڈآن فنڈآتا دمدستی فراوانی آن بیست کلو نُت انا نہاد اٹی 132روپئی، بور ہ نا فی کلو نہاد اٹی 09 روپئی، سی انا نہاد فی کلو 30 روپئی، برنج نا فی کلو نہاد اٹی 20 روپئی و دال تا نہاد اٹی 15روپئی اسکان کمتی آن دا گڑاک یوٹیلیٹی اسٹور آتیان الس ءِ فراوان کننگرہ ۔ وزیراعظم ءِ یوٹیلیٹی اسٹورز آتے ٹی کرپشن نا سدباب و گڑاتا نغڑد ءِ توننگ و الس اسکان ضرورت نا گڑاتا وافر سپلائی ءِ المی کننگ کن چست کروک آ گام گیج آتیا سرجم وڑاٹ حوال کننگا ۔ وزیراعظم ءِ پاننگاکہ یوٹیلیٹی اسٹورز آتے کن بھلو کچ اسے ٹی گڑاتا ہلنگ آن پد داہیت ءِ المی کننگ انگ ءِ کہ او یوٹیلیٹی اسٹورز آا ویئر ہاءوسز (گودام) آتسکان مچ آ مقدار اٹی سرمریر ہراڑے اوفتا خصوصی پیکنگ مرسا یوٹیلیٹی اسٹور آتسکان ترسیل کننگک ۔ دا گام گیج آتا مسخت یوٹیلیٹی اسٹور آتیان ہراڑے وڈی خوری نا توننگ ءِ ہموڑے گڑاتا آبءِ ہم المی کننگ نا ءِ ۔ داوخت آ وزیراعظم پارت کرے کہ یوٹیلیٹی اسٹور آتیان کرپشن نا پورو چٹفنگ کن انفارمیشن ٹیکنالوجی ءِ کاریم اٹ اتنگے ۔ بنجائی وزیر مواصلات مراد سعید پارے کہ چار ہزار یوٹیلیٹی اسٹورز آتا نیٹ ورک آن بیدس مچ آ ملک اٹی تالان ہشت سد پوسٹ آفس آتے ہم ضرورت نا گڑاتا فراوانی کن کاریم اٹ اتنگ مریک ۔ اوپارے کہ بھاز زوت پاکستان پوسٹ آفس نا کنڈآن ضرورت نا گڑاتا اُراتسکان فراوانی کن ہوم ڈیلیوری سروس اس ہم بناکننگک ۔ وزیراعظم عمران خان پارے کہ الس ءِ ریلیف فراوان کننگ حکومت نا اولیت ءِ ۔ اوپارے کہ ننا پورو کوشست ءِ کہ کم کٹیا کروک بندغ و نیزگاری آن زہمی خاہوت آتے خصوصی ریلیف فراوان کننگے ۔ وزیراعظم پارے کہ زرگزران نا حالیت آتا رداٹ حکومت مشکل ءُ فیصلہ کرے ۔ دا فیصلہ غاتا سوب آن اینو زرگزران اٹی سوگوی ءِ و اقتصادی ٹک آک گچینی ظاہر کننگ ءُ، بروک آ دے تیٹی داٹی پین گچینی بریک ۔ مشکل حالیت آتیان پد ہم الس ءِ ریلیف فراوان کننگ نا ہروڑ کوشست ءِ برجاتخنگک ۔ وزیراعظم یوٹیلیٹی اسٹورز انتظامیہ ءِ پارت کرے کہ حکومت نا کنڈآن شش ارب روپئی نا دمدستی فراوانی آن پد ضرورت نا گڑاتا الس اسکان دستیابی ءِ زوت آن زوت المی جوڑ کننگے ۔