اسلام آباد ۔ 17اکتوبر (اے پی پی) وزیر خارجہ شاہ محمود قریشی پارینے کہ پاکستان نا خارجہ پالیسی بدل مرسا علاقائی و جہانی حالیت آتے ٹی بے کچ اہمیت دوئی کرینے ۔ جہانی معیشت نا وت دیکی آن دے ٹکی نا کنڈابدل مننگ ءِ ، ننا ڈیہہ ٹی شونداری و علاقائی رابطہ غاتا بابت بے پناہ وارخواہی و لاءخی ارے، پرامن ہمسائیگی ننا منشور ءِ ، بھارت نا توسیع پسندانہ عزم پاکستان نا سلامتی کن خطرہ سے ۔ اوغان تنازعہ نا ہچ ءُ فوجی ایسری اس اف ، ننے اومیت ءِ اکہ امریکہ و طالبان اٹی ہیت وگپ دُوارہ بحال مریک، سینئر طالبان راہشون تا ردعمل آن ننا است بڈی مسنے ، سی پیک پاکستان نا شونداری نا بنداوی تمبہ ءِ، چینی زرکاری نا پین ڈٹ آتیان معیشت ءِ پین سوگوی ملک، پاکستان جہانی زرکار و سیل و سواتی تیکن است چکوک ہند اس جوڑ مسنے، ایران و سعودی عرب تون بنائی سلابت آن ننا است بڈی مسنے و بے چیٹی تیٹی کمتی بسنے ۔ جنگ و جھیڑہ نا جاگہ غا کمکاری آ چکار کننگ نا گرج ءِ ۔ پنچ شنبے نادے آ ایئر یونیورسٹی اسلام آباد اٹی تران کرسا وزیر خارجہ شاہ محمود قریشی پارے کہ پاکستان نا خارجہ پالیسی بدل مرسا علاقائی و جہانی حالیت آتے ٹی بے کچ اہمیت دوئی کرینے، ہروخت ہریفنگک کہ بین الریاستی تعلقداری تیٹی نن علاقائی و جہانی کہول آ تینا قومی و سفارتی فائدہ غاتا رکھ ءِ ہمہ کننگ کینہ و اوفتے ہمہ مون آ دننگ کینہ ۔ دانا گونڈ ءُ ورندی اس دادے کہ بے کچ ہوشمندی اٹ نن داوڑ کننگ کینہ ۔ اوپارے کہ خارجہ پالیسی نا تیاری مدام آن پیچیدہ و وسیع عمل اس مسنے ۔ داٹی کلیدی کڑدہ غاتون سرجم سلابت درکار مریک ۔ قومی اختیار نا غٹ اجزا دُن کہ معاشی واک، راجی ہم گرنچی، ادارہ جاتی توازن، فوجی لاءخی،سیوتی تا نیٹ ورک ، نظریاتی پختگی ہمو منہ پہلو ءُ ہر اخارجہ پالیسی نا تیاری و تدریج اٹی اہم ءُ ۔ ننا ڈیہہ ٹی شونداری و علاقائی رابطہ غاتا رداٹ بے پناہ وارخواہی و لاءخی ارے ۔ اوپارے کہ دُن انگا مشکل حالیت آتے ٹی پاکستان نا خارجہ پالیسی اولیت متعین ءِ، برجا چیلنج آتون مقابلہ کرسا، حالیت و واقعہ غاتیان فائدہ ہرفسا قومی فائدہ غاتا رکھ ننا جستجو نا محور و مرکز ءِ ۔
