کوءٹہ ۔ 06 ستمبر (اے پی پی) وزیراعلیٰ بلوچستان جام کمال خان پارینے کہ دشمن ہمیشہ پاکستانی قوم انا جوزہ و پاک فوج انا عزم و چاہنداری نا بابت غلط فہمی نا گواچی مسنے، دشمن ہراتم کہ جارحیت کرے پاک فوج اودے پبی ورندی تسنے، داسال 28 فروری آ پاک فضائیہ نا شاہین آک بھارت نا اِراجنگی جہاز آتے خلسا نئے بیرہ قوم انا کاٹم ءِ گمر اٹ بڑز کریر بلکن دنیا ءِ پاریر کہ پاک فضائیہ دنیا نا گچین انگا چاگڑدی فورس ءِ ، قوم پاک فضائیہ نا منت واری ءِ ہرفک، داخیال آتا درشانی ءِ او سمنگلی ایئر بیس آ یوم دفاع پاکستان نا بابت اڈہلوک آ دود آن تران کرسا کرے، کمانڈنٹ ایئر وار کالج ایئر وائس مارشل ذوالفقار قریشی و کمانڈر سمنگلی ایئر بیس ایئر کموڈور زبیر حسن خان آن بیدس پاک فضائیہ نا آفیسر و رناک و خلقت نا بھلو کچ اس دود اٹی ساڑی ئسر ، وزیراعلیٰ پارے کہ قومک جوزہ غاتے اٹ جوڑ مریرہ و جوزہ ہی قوم تے سرسہب کیک، ہرا قومک تینا قربانی تے زیان کیرہ اوفتا سرسہبی تا کنڈاہِننگ مشکل مریک ، وزیراعلیٰ پارے کہ تاریخ تینے دہراءفک و نن قدرت نا کاریم تے دمدستی وڑاٹ پہہ مفنہ، قیام پاکستان نا وخت گڑاس خلقت نا گڑتیک ئسر کہ مسلمان تیکن جتا ریاست اسے نا گرج ارے کہ اف ولے اینو بھارت نا مکروہ دروشم ءِ خنسا اِرا قومی نظریہ نا اہمیت و پاکستان نا جوڑ کننگ نا مسخت پید وار مسنے، اوپارے کہ اینو آر ایس ایس و بی جے پی حکومت انتس کہ کشمیر اٹی کننگ ءِ دا اسہ خاص ءُ تپہ فکر نا نمائندگی اسے ہرا بھارت اٹی مسلمان تتون اوار اوار ایلو اقلیت آتے ہم ظلم و جبر نا شست کننگ انگ ءِ ، کشمیراٹی انسانی حق انا خلاف ورزی و اقلیت آتا برخلاف گام گیج آن مودی و گندہ انگا سوچ تخوک دا تپہ نا مکروہ دروشم دنیا نا مون آ بسنے و مچ آدنیا ٹی کشمیری تیا بھارتی بیدادی نا برخلاف جوان ءُ توار اس بش مسنے ، وزیراعلیٰ پارے کہ اینو مچ آ قوم یوم کشمیر و یوم دفاع اڈ تننگ ءِ ، ملک انا جغرافیائی سیم تا رکھ و امن اٹی پاکستان نا فوج ، سیکورٹی فورسز، شاری و کودک چناتا قربانیک اوارءُ، نن شہید آتا خاہوت آتے خراج تحسین پیش کینہ، اوپارے کہ ننے ہندن ءُ دشمن اسے نا مون تروک ءِ ہرانا عزم تو ننے سماءِ ولے او سہی معنہ ٹی مون آ بفک نن پانزدہ سال آن غیر روایتی جنگ کننگ اُن ہراقوم اٹی بیش بہا جانی و معاشی قربانی تسنے، دہشت گردی تون اوار اوار ننے راجی و معاشی شونداری نا چیلنج نا ہم مون تروک ءِ ، اوپارے کہ پاکستان عام ءُ چنکو ملک اس اف بلکن 28 کروڑ خلقت نا ملک ءِ نن آجو و وتواجہ اُن و دنیا نا بھاز انگا ملک آتیان بھاز جوان اُن اللہ تعالیٰ پاکستان ءِ بے پناہ وسیلہ تسنے و دا ملک اللہ تعالیٰ نا خاص ءُ ٹیکی اسے ، گرج دا ہیت انا ءِ کہ نن قدرت نا دا خزانہ غاتے کاریم اٹ اتین و اللہ نا شکر ءِ ادا کین، وزیراعلیٰ پارے کہ اللہ تعالیٰ پاکستان ءِ اسہ خاص ءُ مسخت اسے کن جوڑ کرینے ہراہمیشہ قائم مریک، ننا پوسکن آ چین ننا اومیت و سرمایہ ءُ ، اوفتیا زرکاری کننگ نا گرج ءِ ، ننے تینا چناتے داسی آن آجوئی، وتواجہی، وطن تون مابت و قربانی نا جوزہ آن روشناس کروئی ءِ تانکہ ہراتم دا بھلن مریر تو اوفتے تینا سمت انا سمامرے، وزیراعلیٰ پارے کہ معیشت سوگو مریک تو معاشی شونداری ہم مریک و نن دانا جوان رکھ ءِ ہم کننگ کینہ، ہرا یقینا سیاسی حکومت آتا زمواری ءِ و نن دا زمواری نا ادائیگی ءِ اسہ قومی ءُ فرض اسے نا وڑاٹ کننگ اُن، داکان پد وزیراعلیٰ یوم دفاع نا مناسبت اٹ خلوک آ نمائش نا بناءِ کرے و چندی اسٹال آتے ٹی تخوک گڑاحرب و جنگی جہاز آتا معائنہ ءِ کرے ۔ داوخت آ ایف16- ، جے ایف 17 تھنڈر، میراج و پی ایف 7 جہاز آک شاندار فضائی مظاہرہ اس پیش کریر ۔
