دھرنا  ءُ زھرشانی ءِ پالیسی ءِ وسیلگ ءَ معیشت ءُ پاکستان ءِ میاں اوستمانی ساکھ ءَ را تاوان دیگ راجدپتر ءِ ھلاپ اِنت، پی ٹی آئی وتی ھیال ءَ بہ کپ اِیت ءُ لانگ مارچ ءَ را ھلاس بہ کنت، مزن وزیر شہباز شریف

اسلام آباد۔6اکتوبر  (اے پی پی): مزن وزیر محمد شہباز شریف ءَ دھرنا ءُ زھرشانی ءِ پالیشی ءَ را راجی معیشت ءُ پاکستان ءِ میاں اوستمانی ساکھ ءِ واستہ سک باز تاوان لیک اِتگ ءُ گْوشتگ کہ دھرنا ءِ پالیشی ءِ وسیلگ ءَ معیشت ءَ را تاوان دیگ راجدپتر ءِ ھلاپ اِنت۔ تحریک انصاف وتی ہوش ءَ بیا ایت ءُ زہرشانی ءِ پالیسی ءِ وسیلہ ءَ ملک ءِ معیشت ءَ بوتگیں تاوان ءَ سرپد بہ بیت ءُ لانگ مارچ ءَ ہلاس بہ کنت۔ حکومت مردمانی جان ءُ مال ءِ ایمنی ءِ ھاترا ھرچ وڑیں گامگیج چست کنت۔ سرکار ءُ پیپلز پارٹی ءِ یکجائی کمیٹی ءَ جیڈھ آنی گیواری ءَ بامرد ءُ ایمانداریں گپ ءُ تران ءِ وسیلگ ءَ کوشست کت ۔ اے ھیالانی درشانی آئی ءَ سئے شمبے ءِ روچ ءَ کشمرا چوک انڈر پاس ءِ بُن ھشت ایر کنگ ءِ مراگش ءَ گشتانک دیان ءَ کت۔ مراگش ءِ تہ ءَ وفاقی تہی کارانی وزیر محسن نقوی، وفاقی وزیر ءِ اھوالکاری عطا اللہ تارڑ، پارلیمانی کارانی وفاقی وزیر ڈاکٹر طارق فضل چوہدری، مملکت ءِ وزیر طلال چوہدری ھم ھوار اتنت۔ مزن وزیر ءَ گوشت کہ استیں حکومت ملک ءِ دیمروئی ءُ اقتصادی برجائی ءِ واستہ شپ روچ کار کنگ ءَ اِنت۔ ما گوں دو سال ءُ نیم ءِ محنت ءَ ملک ءِ مردماں وتی پاداں اوشتارینتگ ءُ ملک ءِ پیداوار گیش بوتگ۔ یک نیمگے دیمروی ءِ کار جاری اِنت ءُ دومی نیمگ ءَ بدبھتی ءَ یک رندے پد ءَ لانگ مارچ، دھرناا ءُ زھرشانی ءِ بیمناکیں رواج دیم ءَ آیگ ءَ اِنت۔ مزن وزیر ءَ گوشت کہ ما وت مہ وتی شور ءُ سلاھ ءِ وسیلگ ءَ پیسلہ کتگ کہ تحریک انصاف ءِ سروکی ءَ گوں بامرد، مول ءُ مراد ءُ دلجمیں گپ ءُ تران کنگ بہ بیت تانکہ آ لانگ مارچ، دھرناا ءُ زھرشانی ءِ جرات ءَ ھلاس بہ کن اَنت ءُ جیڈھ آنی گیواری ءَ یکجائی ءَ بہ کن اَنت۔ سرکار ءُ پیپلز پارٹی ءِ یکجائی کمیٹی آں گوں آہاں دو روچ ءَ اسپیکر چیمبر ءَ گپ ءُ تران کتگ ۔ امیت بوتگ ات کہ گپ ءُ تران ءِ جوانیں آسر دیم ءَ کیت ءُ دھرناا گوں گپ ءُ تران ءَ آسر بیت ۔ دوئیں گلاں گوں پی ٹی آئی ءَ سنجیدگی ءَ گپ جتگ بلے دومی نیمگ ءَ باز رند ءَ تپاک کتگیں مسودہ بدل کتگ کہ ایشی ءَ چہ اے گپ پدر بوتگ کہ آھانی مول ءُ مراد گپ ءُ تران ءَ سوبمند کنگ نہ اِنت۔ مزن وزیر ءَ بے دروریں رنگ ءَ گوشت کہ دھرناا ءُ زھرشانی ملک ءِ معیشت ءَ را نشانگ جوڑ کنت، برآمدات ءَ را تاوان دنت، ءُ صنعتی پیداوار ءَ را تاوان رسیت کہ ایشی ءَ چہ ملک ءُ راج ءَ را تاوان رسیت۔ مزن وزیر ءَ گوشت کہ ما دو سال ءُ نیم ءَ چہ یکجائی کوشست ءَ چہ ملک ءِ معیشت ءَ پاد آنی سر ءَ اوشتارینتگ۔ ملک ءَ اقتصادی برحامی اتکگ۔ البت معاشی استحکام گوں مزنیں مشکلے ءَ رستگ ات۔ آیا پدا دیمروئی ءِ راہ ءِ بند کنگ قوم دژمن نہ انت؟ اے کار ءِ مول ءُ مراد پاکستان ءِ جھان ءِ ساکھ ءَ را تاوان دیگ اِنت، آئی ءَ گوشت کہ ستمبر ءَ گوستگیں سال ءُ سرجمیں سال ءِ ستمبر ءِ مقابلہ ءَ برآمدات گیش بوتگ، آئی ٹی برآمدات گیش بوتگ، زرّ ءِ دیم دیگ گیش بوتگ، ملکی پیداوار گیش بوتگ، زھرشانی ءُ دھرناا ءِ وسیلگ ءَ ایشی ءَ را تاوان دیگ راجی دژمن اِنت۔ مزن وزیر ءَ اے گپ پدر کت کہ الس ءِ جان ءُ مال ءِ رکھینگ حکومت ءِ ذمہ واری انت ءُ آئی ءَ را تاوان دیوکیں مردمانی ھلاپ ءَ کانود وتی راہ ءَ زوریت، آ مئے معیشت ءِ تہ ءَ گہتری ءَ را ھم منگ ءَ ات۔ تحریک انصاف سرپد بہ بیت ءُ زھرشانی ءُ لانگ مارچ ءِ آسراں ھیال بہ کنت کہ ایشی ءَ چہ راج ءَ نپ رسیت یا تاوان؟ زھرشانی ءُ دھرناا ءِ سبب ءَ ملک ءَ را بوتگیں تاوان ءِ سرپد بوھگ ءَ پد تحریک انصاف ءَ را لانگ مارچ ھلاس کنگ ءِ لوٹ کتگ ۔ حکومت گپ ءُ تران ءِ وسیلگ ءَ جیڑہانی گیشواری ءَ شوہاز کنت۔ آئی ءَ گوشت کہ ھمک پاکستانی ءِ واھشت انت کہ ملک ءَ گوں توسیپ ءُ ایمانداری ءَ دیمروئی ءِ کشک ءَ جُنزان بہ بیت۔ مزن وزیر محمد شہباز شریف ءَ منصوبگ ءِ بابت ءَ گپ جنان ءَ گوشت کہ مرچی کشمیر چوک انڈر پاس منصوبگ ءِ بُن ھشت ایر کنگ بوت۔ وزیر داخلہ ءَ یک ماہ ءِ تہا سرجم کنگ ءِ دل یکیمی داتگ کہ ایشی ءِ ھاتر ءَ وزیر داخلہ ءُ آئی ءِ ٹیم مبارکی ءِ مستحق انت۔ کشمیر چوک ءِ نام کشمیر ءِ نام ءَ انت، اے شاہراہ یک روچے سری نگر ءَ سر بیت، کشمیری آں آجوئی ءُ بنیاتی حق رس انت۔ آئی ءَ گوشت کہ اے رنگیں دیمروئی منصوبگ آنی مول ءُ مراد الس آناں تر ءُ تاب ءِ آسراتی پجاری کنگ انت ۔ وسیع سڑک ءُ پریشانی ءِ چہ پاکیں سفری آسراتی ءَ چہ وھد ءِ بچت ءُ منزل ءَ وھد ءِ سر ءَ سر بوھگ ءَ کمک رسیت کہ ایشی ءَ چہ ملک ءِ چاگردی ءُ اقتصادی دیمروئی ءِ سفر تیز بیت۔ وفاقی داخلہ ءِ وزیر محسن نقوی ءَ مراگش ءَ گوں تران کنان ءَ گوشت کہ مزن وزیر محمد شہباز شریف ءَ شنگھائی کمکی گل ءِ کانفرنس ءَ چہ پیسر وفاقی دارالحکومت اسلام آباد ءَ را یک نوکیں، جتائیں ءُ مثالی زیبائیں شہر ءِ تہ ءَ بدل کنگ ءِ وژن داتگ۔ کانفرنس ءِ وھد ءَ یک سال ءَ چہ کم وھد ھست، پمیشکا شپ ءُ روچ کار کنگ ءَ سرجمیں دیمروئی منصوبگ ایر کنگ بوتگیں وھد ءِ تہ ءَ سرجم کنگ بوھگ ءَ اَنت تانکہ پاکستان ءِ تر ءُ تاب ءَ آیوکیں ملک ءِ شرپداریں مہمان آناں جوانیں آسراتی پجاری کنگ بہ بیت ءُ ملک ءِ جوانیں امیج دیم ءَ آرگ بہ بیت۔ وزیر ءِ تہی کار ءَ گوشت کہ مزن وزیر ءَ ھاسیں کار ءِ زمہ واری داتگ کہ ایس سی او کانفرنس ءَ چہ پیسر کشمرل چوک انڈر پاس ءَ ھوار ھاسیں ٹریفک ءُ انفراسٹرکچر منصوبگ سرجم کنگ بہ بنت۔ اے نوکیں انڈر پاس ءُ ایکسپریس وے سروس لین ءِ سرجمی ءَ چہ راولپنڈی ءُ اسلام آباد ءِ دوئیں شہر آنی مسافر آناں وتی روچ ءِ رؤگ ءُ آیگ ءِ تہ ءَ مزنیں آسراتی رس ایت ءُ دوئیں شہر آنی نیام ءَ سفر ءِ وھد ایوک ءَ 16 ءَ چہ 18منٹ ءَ کم کنگ بیت۔ محسن نقوی ءَ دارالحکومت ءِ چاگرد ءُ ایکولوجی ءِ ھوالگ ءَ ھاسیں جار جنان ءَ گوشت کہ اسلام آباد ءِ ایف 9 پارک ءَ را میاں اوستمانی تک ءِ نوکیں تفریحی مرکز ءِ رنگ ءَ بدل کنگ بوھگ ءَ اِنت۔ ایشی ءَ ابید دارالحکومت ءَ مزنیں سفاری پارک ءِ جوڑ کنگ ءِ ھم منصوبگ جوڑ کنگ بوتگ کہ اے چاگرد ءُ دلگوش ءِ پڑ ءَ مزنیں سنگ میل ثابت بیت۔ آئی ءَ گیش ءَ چہ گیش پدر کت کہ چاگردی رکھینگ ءُ  حکومت ءِ شہر ءَ را سبز ءُ ساپ دارگ ءِ منصوبہ ءِ رد ءَ 31 دسمبر ءَ تاں اسلام آباد ءَ را سرجمیں ’’پلاسٹک ءَ چہ پاک شہر‘‘ جوڑ کنگ ءِ ٹارگٹ ءَ را سک باز پیلو کنگ بیت۔ ایشی ءَ ابید دگہ یک منصوبگے اسلام آباد ءَ پلاسٹک ءَ چہ پاک کنگ اِنت۔ اے دوئیں منصوبگ آنی سر ءَ وزیر مملکت ءِ تہی کار طلال چوہدری ءِ نگرانی کنگ بوھگ ءَ اِنت۔ ایشی ءَ چہ پیسر مزن وزیر محمد شہباز شریف ءَ کشمر چوک انڈر پاس منصوبگ ءِ بُن ھشت ایر کت کہ یک ماہے ءِ تہ ءَ یک ارب 45ارب کلدار ءِ ھرچ ءُ درچ ءَ سرجم کنگ بیت۔ اے موہ ءِ سر ءَ مزن وزیر ءَ را کشمر چوک انڈر پاس منصوبگ ءِ بابت ءَ سرپد کت۔ منصوبگ ءِ چیر دستی ءَ ادا دو راہی انڈر پاس جوڑ کنگ بیت۔ اے منصوبگ ءِ سرجمی ءَ گوں فضل آباد، بہار کاہو، مری، ءُ آزاد کشمیر ءَ چہ ٹریفک ءِ روگ ءُ آیگ ءِ ھچ وڑیں رکاوٹ برجاہ بیت۔