اسلام آباد ۔ 06ستمبر (اے پی پی) وزیراعظم عمران خان تعمیراتی بشخ اٹی متعین خراج نا نافذ و اودے صنعت نا درجہ تننگ نا سلاہ تیان امنا کرسا تعلقدار محکمہ غاتے پارت کرینے کہ دا سلاہ تیا غور و دابارواٹی رپورٹ اس پیش کننگے، چنکا و درمیانی صنعت آتا شونداری نا بابت بنجائی و صوبائی محکمہ غاتا نیام اٹ گچین رابطہ و مون تروک اڑاند آتے مر کننگ کن سمیڈا ءِ پین فعال کننگے ۔ اوداہیت ءِ جمعہ نادے آحکومت نا معاشی ٹیم انا دیوان نا کماشی ءِ کرسا پارے ہراٹی چنکا و درمیانہ صنعت آتا شونداری کن چست کروک آ گام گیج، تعمیراتی بشخ انا مون آ دننگ، نیزگاری نا چٹفنگ کن ساڑی حکومت نا غٹ آن اہم ڈٹ’’احساس پروگرام‘‘آ پیش رفت و معیشت نا شونداری کن چندی وزارت آتا کنڈآن چست کروک آ گام گیج آتا جاچ ءِ ہلنگا ۔ دیوان نا بناٹی تدوک آدیوان اٹی کروک آ فیصلہ غاتیا عملدرآمد نارپورٹ ءِ وزیراعظم ءِ پیش کننگا ۔ گورنر اسٹیٹ بینک انا کنڈآن چنکا و درمیانہ درجہ نا صنعت (ایس ایم ایز) نا شونداری کن اسٹیٹ بینک آف پاکستان نا کنڈآن چست کروک آ گام گیج آتیا سرجم بریفنگ تننگا ۔
