حکومت ٹیکسٹائل و گارمنٹس بشخ انا شونداری کن ہروڑگام گیج چست کیک
اسلام آباد ۔ 06 ستمبر (اے پی پی) وزیراعظم عمران خان ٹیکسٹائل و گارمنٹس نا بشخ اتون وابستہ کاروباری شخصیت آتے باوری کرفینے کہ دا بشخ انا شونداری کن حکومت ہروڑ نا گام گیج چست کیک، ملبوسات آتا تیاری و برآمد آتا بشخ انا شونداری آن نئے بیرہ روزگار نا بھلو وارخواہی اس دوبریک بلکن درآمدات و برامد آتا نیام اٹ پرخ ءِ کم کننگ اٹ ہم کمک رسینگک ۔ اوداہیت ءِ جمعہ نادے آ ٹیکسٹائل وگارمنٹس نا بشخ اتون تعلق تخوک آ پنی آ واپاری شخصیت آتا ڈل اتون اوڑدہی ٹی گپ و تران کرسا پارے ۔ دیوان اٹی سلاہکار واپار عبدالرزاق داءود ،گورنر اسٹیٹ بینک ڈاکٹر رضاباقر ، وزیر صنعت پنجاب میاں محمد اسلم اقبال، لیبر منسٹر پنجاب انصر مجید خان، چیئرمین زرکاری بورڈ سیدزبیر حیدر گیلانی و سینئر آفیسر آک ہم ساڑی ئسر ۔ داوخت آ وزیراعظم عمران خان ءِ ٹیکسٹائل و گارمنٹس نا بشخ اٹی ملکی استعداد، بشخ انا شونداری و مون آ دننگ اٹی بروک آ مشکل و آخبت نا لاءحہ عمل آ سرجم بریفنگ تننگا ۔ وزیراعظم ءِ پاننگاکہ ٹیکسٹائل و ملبوسات آتا بشخ اٹی شرح نمو محض 3;46;3 درسد ءِ ہراٹی ودکی نا بے شمار وارخواہی ارے ۔ دیوان ءِ پاننگاکہ امن و ایمنی نا حالیت، بینک آتون دا بشخ اکن مالی کمکاری نا فراوانی، کاروباری آسراتی ، بے کسبکار لیبر و مریس مدت پالیسی نا ساڑی مفننگ پین پین بھلا اڑاند آک ئسر ہرافتے ٹی خاطرخواہ گچینی بننگ ءِ ۔ وزیراعظم ءِ پاننگاکہ سازگار حالیت و تزویراتی گام گیج آتیان ملبوسات نا برآمدآتے 2030 ء اسکان چِل ارب ڈالر اسکان ودفنگ مریک ۔ دارداٹ وزیراعظم ءِ گارمنٹس و ٹیکسٹائل نا ڈل انا کنڈآن چندی سلاہ پیش کننگا ۔ داوخت آ وزیراعظم عمران خان ڈل ءِ باوری کرفے کہ اوفتا سلاہ تیا سرجم غور کننگک ۔ وزیراعظم ڈل ءِ باوری کرفے کہ بشخ انا شونداری کن حکومت ہروڑ گام گیج چست کیک ۔ اوپارے کہ ملبوسات آتا تیاری و برآمد آتا بشخ انا شونداری آن نئے بیرہ اسہ بھلو کچ اسے روزگار نا وارخواہی دوبریک بلکن جم وڑاٹ درآمد و برآمد آتا نیام اٹ پرخ ءِ کم کننگ اٹ ہم خاطرخواہ کمک رسینگک ۔
