کوءٹہ ۔ 06 ستمبر (اے پی پی) قائم مقام گورنر بلوچستان میر عبدالقدوس بزنجو یوم دفاع پاکستان نا وخت آ تینا اسہ کلہو اسے ٹی پارینے کہ پاکستان نا تاریخ اٹی 6 ستمبر نادے خصوصی ءُ اہمیت اس تخک انتئے کہ اینو آن 52 سال مست ہندا تاریخ آ ننا بہادر سلہہ بند فوج تینے آن کیہی گنا واکدار دشمن نا جارحیت نا پبی ورندی ءِ ترسا و وطن عزیز نا پورو سرسہبی اتون دفاع ءِ کرسا داتاریخ ءِ نوشتہ کریسر،اوپارے کہ دا ہمودے ءِ ہراتم ننا فوج جیرت و بہادری نا عظیم الشان مظاہرہ ءِ کرسا دشمن نا ناپاک عزم ءِ مش تا کرے و لمہ وطن نا دفاع کن سیسہ پلائی دیوال اس جوڑ مسر ۔ قائم مقام گورنر داہیت آ زور شاغا کہ اینو نادے تینا دا عہدہ نا تجدید ءِ بایدے کننگے کہ نن تینا عظیم شہید آتا قربانی تے رائیگاں مننگ کن الیپنہ و تینا ہنین آ وطن نا رکھ ، سالمیت و دفاع کن ہروڑ نا قربانی ایتنہ ۔ اوپارے کہ اینو ننے ولدا ہمو جوزہ و عزم انا گرج ءِ ہرانا درشانی ءِ مچ آ قوم ستمبر 1965 نا جنگ اٹی کریسر ۔ اودعا کرے کہ اللہ تعالیٰ ننا ملک ءِ تینا حفاظت اٹ کے اونا جوڑ کننگ و شونداری کن ہمت و توفیق ایتے ۔
