اسلام آباد ۔ 06 ستمبر (اے پی پی) قومی اسمبلی نا قائمہ کمیٹی امور کشمیر و گلگت بلتستان مقبوضہ جموں و کشمیر اٹی بھارت نا کنڈآن کشمیر نا خصوصی حیثیت ءِ چٹفنگ، وادی کشمیر اٹی کرفیو و ظلم و ستم نا برخلاف مذمتی قرارداد ءِ امنائی وڑاٹ منظور کرسا جہانی برادری و اقوام متحدہ ءِ پارینو کہ ڈیہہ نا ساڑی خطرناک حالیت آتے ٹی او مثبت و فیصلہ کن کڑد ادا کیر ۔ کمیٹی نا دیوان جمعہ نادے آ چیئرمین رانا شمیم احمد خان نا کماشی ٹی پارلیمنٹ ہاءوس اٹی اڈ ہلک ۔ دیوان ءِ حکومت آزاد کشمیر نا کنڈآن پاننگاکہ آر پار بس سروس نا کمک اٹ داوخت اسکان 40 ہزار 485 کشمیریک سفر کرینو ہراٹی 26ہزار 11 آزاد کشمیر آن مقبوضہ کشمیر آ ہنار وخت اس کہ 14ہزار 474آزاد کشمیر آ بسر ۔ مقبوضہ کشمیر اٹی 5 اگست نا گام گیج آن پد دا بس سفر معطل و آرپار واپار ہم بند ءِ ۔ دیوان اٹی امنائی وڑاٹ قرارداد منظور کننگا ہراٹی پاننگانے کہ مقبوضہ کشمیر اٹی ظلم انا انتہادادے کہ اینو کرفیو نا 33می دے ءِ ، خلقت ءِ سم اٹ خلنگ انگ ءِ ، واپاری زند بند و خلقت ءِ خور ہم میسر اف، دوائی ودی مفننگ ءِ ، کشمیری سرکڑدہ غاک جیل آتے ٹی ءُ ۔ زالبول نا عصمت دری مننگ ءِ ، چناتا حق ءِ سلب و تعلیمی چرجوئی ہم بند ءِ، ورناتے بیدادی نا شست کننگ انگ ءِ، مسیت آتے تالا خلوک ءِ ۔ قرارداد اٹی پاننگانے کہ دا نسل کشی آ جہانی برادری چپ ءِ و اوفتا چپی نا سوب کشمیر مسلمان تا ویل ءِ ۔ قرارداد اٹی پاننگانے کہ ڈیہہ نا ساڑی خطر ناک حالیت آتے ٹی اقوام متحدہ ، او آئی سی تون اوار ایلو جہانی تنظیمک و جہانی برادری ءِ مثبت و فیصلہ کن کڑد ادا کروئی مرے ۔ کمیٹی ءِ بھارتی آئین نا آرٹیکل 370 نا بارواٹ حوال تننگا ۔ سیکرٹری لبریشن سیل منصور خان کمیٹی ءِ بریفنگ ترسا پارے کہ دا آرٹیکل اٹی پاننگانے کہ ریاست تینا آئین ءِ تینٹ جوڑ کیک ۔ 1947ء ٹی کشمیر اٹی مسلمان تا آبادی 70 درسد ئس ۔ 2011ء آن داوخت اسکان اسہ لکھ کشمیری تے شہید کننگانے ۔ بھارت نا ڈٹ ہندوتوانا ءِ کہ کشمیر اٹی بیرہ ہندوک رہینگر ۔ ہندوتے جموں کشمیر اٹی ہنکین تننگ انگ ءِ ۔ 500 ہندوچناتے ڈومیسائل تننگا نے ۔ فوج انا ریٹائرڈ خلقت ءِ جموں کشمیر اٹی ڈغار الاٹ کننگ انگ ءِ ۔ بھارتی داسہ کشمیر اٹی نیام تمنگ کیرہ ۔ جموں کشمیر آن ہمپوک آتا ڈغار تے ہم ہندوتے تننگا ۔ کمیٹی داوخت آ سلاہ تس کہ ساڑی حالیت آتے جہانی کہول آ پبی وڑاٹ چست کننگے ۔ ریڈکراس ءِ کشمیر اٹ گدریفنگے ۔ قومی و جہانی کہول آ دنیا ءِ معلومدار کننگے ۔ غٹ پارلیمنٹ نا باسک آک کشمیری تا است بڈی ءِ کننگ کن ایل او سی نا دورہ ءِ کیر ۔ الیکٹرانک میڈیا غا زیات آن زیات کشمیری تا بابت پروگرام کننگے ۔ دیوان ءِ وزارت خارجہ نا کنڈآن ان کیمرا بریفنگ ہم تننگا ۔
