ڈیہہ نا اِرا عظیم ملک آک سویلی ایشیا ٹی شونداری و سوگوی کن اواری اٹ گام گیج کننگ ءُ، سفیر نغمانہ ہاشمی
بیجنگ ۔ 06ستمبر (اے پی پی) پاکستان و چین شونداری نا پوسکن آ مرحلہ غاتے ٹی پترینگ انگ کن تیاری کننگ ءُ ۔ چین اٹی پاکستان نا سفیر نغمانہ ہاشمی پارے کہ چین پاکستان اقتصادی راہداری ڈٹ(سی پیک) نا رداٹ جاری چندی ڈٹ آتا وخت آن مست پوروی آن پد پاکستان و چین ہڑتوم آ ملک آک داسہ بڑزکو آب انا شونداری نا پوسکن آ دور اٹی پترینگ انگ کن تیاری کننگ ءُ ۔ پاک چین سنگتی و سی پیک نا رداٹ جوڑ کروک آ دستاویزی فلم ’’آئرن برادرز‘‘ نا نمائش دود آن تران کرسا او پارے کہ سی پیک نا اولیکو مرحلہ سرسہبی اٹ تینا پوروی نا خڑک ءِ و داسہ ہڑتوم آ ملک آک بڑزکو آب انا شونداری نا ارٹ میکو مرحلہ ٹی پترینگ انگ کن تیاری کننگ ءُ ۔ اوپارے کہ نن غٹ امنائی ڈٹ آتیا پورو عملدرآمد و نظام الاوقات نار داٹ اوفتا پوروی کن مربوط و سوگو کوشست کرینن ہرافتا وخت آن مست پوروی آن پد داسہ نن صنعتی شونداری، کشاری جدت و معاشی کمکاری پین پین نا پوسکن آ مرحلہ غاتے ٹی پترینگ انگ اُن ۔ پاکستانی سفیر پارے کہ سی پیک آن بیدس پاکستان نا حکومت الس نا راجی آسراتی و ملک انا شونداری و شونہالی کن ہم پین کیہی گام گیج آتے کننگ ءِ ۔ اوپارے کہ ننا چکار راجی و اقتصادی کمکاری نا کمک اٹ نیزگاری نا چٹفنگ، اڑزان ہنکین تا تفنگ، جان جوڑی، تعلیم ، فنی و کسبی ہیل کاری و کنوئی آ ساف دیر پین پین نا ڈٹ آتیا ٹی ءِ ۔ اومستی پارے کہ ڈیہہ نا اِرا عظیم ملک سویلی ایشیا ٹی شونداری و سوگوی کن اواری اٹ گام گیج کننگ ءُ تانکہ سی پیک نا کمک اٹ ڈیہہ نا الس نا زند انا آب اٹی گچینی اتنگ مرے ۔ پاک چین تعلقداری تا بابت پاکستانی سفیر پارے کہ نن ہروڑنا وخت اٹی یکجا مسونن و چین ننا حقی آ سنگت و تزویراتی شریدارءِ ۔
