اسلام آباد ۔ 06 ستمبر (اے پی پی) پارلیمانی امور نا وزیر مملکت علی محمد خان پارینے کہ بیرہ وزیراعظم عمران خان نا حکومت ہی انتہاپسند مودی سرکار ءِ پبی ورندی تننگ کیک ۔ جمعہ نادے اسہ نجی ٹی وی چینل اسے تون گپ و تران کرسا علی محمد خان پارے کہ پاکستان جہانی کہول آ کشمیر نا ویل ءِ جوان وڑاٹ تالان کرینے و داٹی ہچ ءُ شک اس اف کہ وزیراعظم عمران خان نا حکومت ہی انتہاپسند مودی سرکارءِ پبی ورندی تننگ کیک ۔ اوپارے کہ کشمیر پاکستان نا خارجہ پالیسی نا اسہ اہم ءُ جزو اسے و نن مدام تینا کشمیری ایلم تتون سلنہ ۔ علی محمد خان پارے کہ اینو ہراوڑ کشمیر نا ویل آ ورناتپہ یکجا مسنے داکان مست داوڑنظر بتنے ۔ وزیر مملکت پارے کہ کشمیری یقینا تینا حق خودارادیت ءِ دوئی کرسا گڑا چپ کیرہ انتئے کہ اوفک تینا دا مسخت کن عظیم قربانی تسنو ۔ اومستی پارے کہ وزیراعظم عمران خان تینے کشمیر نا سفیر گوندانے ۔ اوپارے کہ ای وزیراعظم ءِ خڑک آن چاوہ و او کشمیر نا ویل انا بابت تینا عزم و ارادہ غاتیا یقینا پورو سلک ۔ علی محمد خان بھارتی حکومت ءِ خبڑدار کرسا پارے کہ پاکستان بھارت نا کنڈآن ہروڑنا جارحیت نا پبی ورندی ءِ تننگ کن پورووڑاٹ تیار ءِ و بھارت نا داوڑنا ہر حرکت آ بھارتی فوج ءِ پبی ورندی تننگک ۔ وزیر مملکت پارے کہ جہانی میڈیا و بھارت نا حزب اختلاف نا جماعت آک ہم مقبوضہ کشمیر اٹی مودی نا پالیسی تیا تنقید کننگ ءُ و کیہی جہانی راہشونک مودی آ زور شاغانو کہ او دا ویل ءِ پاکستان تون پرامن وڑاٹ ایسر کے ۔
