اسلام آباد ۔ 06 ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ یوم دفاع ءِ بہادر کشمیری تتون یکجہتی نا درشانی ءِ کننگ نا وڑاٹ اڈ تسن، دنیا کن ہم کلہو ءِ کہ کشمیر نا ویل ءِ اقوام متحدہ نا قرارداد و جموں و کشمیر نا الس نا است خواہی تا رداٹ ایسر کننگ آن بیدس سویلی ایشیا ٹی پائیدار امن نا تغ پورو مفک، کشمیر پاکستان نا شہ رگ و دفاعی حصار ءِ ، کشمیری تا موقف نا دفاع پاکستان نا دفاع ءِ سوگو کننگ آنبار ءِ ۔ جمعہ نادے آ یوم دفاع و شہید آتیا تینا بیان اٹی اواپارے کہ دا دے ننے ستمبر نا جنگ انا ہمودے تا یات ترفک ہراتم پاکستان نا سلہہ بند فوج دشمن نا ناپاک عزم ءِ مش تا کریسر ، نن تینا غازی و شہید آتے خراج عقیدت پیش کینہ ہرافک جیر ت و شجاعت نا انمول تاریخ اس نوشتہ کریر ۔ اوپارے کہ شہید و غازی تا دے ءِ ہرافتا دتر اٹ لمہ وطن اٹ آجوئی ، سلامتی و پت انا روشنا ئی جوڑ مرسا دے ٹک ایتک، ننا شہید آک قوم انا گمر ءُ ہرافک تینے آن کیہی گنا بھلا دشمن ءِ خلکر نریفیر و تینا شہادت نا جوزہ اٹ وطن نا دفاع نا لازوال داستان نوشتہ کریر ۔ ڈاکٹر فردوس عاشق اعوان پارے کہ دا پاکستان نا عسکری تاریخ نا یات گار ءُ دے اسے ، ننے 1965والا جوزہ و بے مٹ سیوت نا گرج ءِ انتئے کہ دا دے وطن نا دفاع کن ہروڑنا خطرہ غاتا برخلاف ننا سوگو عزم انا اعادہ ءِ کیک، ننا سلہہ بند فوج دشمن نا کنڈآن ہر جارحیت نا پبی ورندی ءِ تننگ کن کسبی لاءخی و کاریم نا کچ آن پورو وڑاٹ لیس ءِ ۔
