اسلام آباد ۔ 06ستمبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ چین ۔ پاکستان اقتصادی راہداری ساڑی حکومت نا مرکزی اولیت آتے ٹی اوارءِ ، سی پیک پاکستان و اونا ہمسایہ چین نا نیام اٹ خڑکی اقتصادی تعلقداری نا خصوصی درشانی ءِ ۔ اوداہیت ءِ جمعہ نادے آ داڑے پاکستان اٹی عوامی جمہوریہ چین نا سفیر یاءو جنگ تون اوڑدہی ٹی گپ و تران کرسا پارے ۔ وزیراعظم نا سلاہکار چینی سفیر ءِ پارے کہ سی پیک نا ڈٹ آتیان پاکستان نامعیشت اٹی گچین بدلی بننگ ءِ، غٹ ڈٹ آتے اولیتی بنداو تیا پورو کننگ انگ ءِ، پاکستان روڈ آتا نیٹ ورک ، توانائی نا ڈت و ایلو بشخ آتے ٹی چین نا کمک ءِ قدر انا نظر اٹ ہرک و اومیت ءِ کہ ہڑتوم آ کنڈآتا کمکاری ، علاقائی رابطہ و سوگوی کن ہڑتوم آ ملک آک اواری اٹ پین داوڑنا گام گیج آتے برجاتخرہ ۔ ڈاکٹر عبدالحفیظ شیخ پارے کہ کابینہ نا اقتصادی رابطہ کمیٹی گوادر پورٹ و گوادر فری زون نا بابت چندی سلاہ و گام گیج آتا منظوری ءِ تسنے، دا سلاہ و گام گیج آتا عملی اطلاق کن تعلقدار کمامدارآتے پارت جاری کننگانے ۔ وزیراعظم نا سلاہکار فنانشل ایکشن ٹاسک فورس نا سفارشات آتا اطلاق کن چین نا کنڈآن تکنیکی کمکاری آ چینی سفیر نا منت واری ءِ ہرفے ۔ اوچین نا سفیر ءِ فنانشنل ایکشن ٹاسک فورس نا سلاہ و سوج آتیا عملدرآمد کن پاکستان نا کنڈآن چست کروک آ گام گیج آتیان معلومدار کرے و پارے کہ دا بابت چندی حکومتی ایجنسی و ادارہ وزارت اقتصادی امور نا کماشی و چاروکی ٹی مربوط وڑاٹ کاریم کننگ ءُ ۔ پاکستان اٹی چین نا سفیر ہڑتوم آ کنڈآتا تعلقداری ٹی گچین خاص کر پاکستان اٹی چینی زرکاری ٹی ودکی کن چین نا حکومت نا عزم انا اعادہ ءِ کرے ۔ اوپارے کہ چین نا حکومت و کمپنیک خاص کر اسیجا ڈٹ آتے ٹی زرکاری کننگ اٹ خصوصی است خواہی تخرہ ۔
