اسلام آباد ۔ 06ستمبر (اے پی پی) چیئرمین سینیٹ محمد صادق سنجرانی پارینے کہ 6ستمبر یوم دفاع پاکستان دشمن نا عزم آتے مش تا گواچی کننگ و پاکستان نا فوج انا جیرت و بہادری نا دے ءِ ، 6 ستمبر آ دشمن ملک انا فوج جہانی سیم تا خلاف ورزی ءِ کرسا نن نیمہ غا مملکت پاکستان آ جلہو کریسر ، پاکستان نا فوج و بہادر الس ملک انا رکھ و سلامتی و آجوئی کن تینا جان تا پرواہ ءِ کتوس بھارتی فوج انا مون آ سیسہ پلائی دیوال اس ثابت مسر و دشمن ملک انا غٹ ناپاک عزم آتے مش تا کریر ۔ جمعہ نادے آ یوم دفاع پاکستان نا وخت آ تینا کلہو اٹی اوپارے کہ یوم دفاع پاکستان دشمن نا عزم آتے مش تا گواچی کننگ و پاکستان نا فوج انا جیرت و بہادری نا دے ءِ ، پاکستان نا فوج دنیا نا بہادر ، جیرت مند و سوگو انگا فوج اٹی شمار مریک ہرانئے بیرہ تینا ملک بلکن اقوام عالم نا امن مشن و انسانیت نا بھلائی کن کیہی وار تینا لاءخی تے منفینے ۔ اوپارے کہ ننے غٹ ءِ تینا فوج آ گمر ءِ ہرادہشت گردی نا لعنت ءِ نیست ونابود کننگ نا نئے بیرہ عزم کرینو بلکن داڑکن ضرب عضب و ردالفساد کون آ آپریشن کرسا دہشت گرد آتے تباہ و بربادکریر ۔ ہنداخاطران پاکستان نا فوج انا بے شمار ورناک تینا زند ءِ ندر کریر ہرادے مچ آ قوم قدر انا نظر اٹ ہرک ۔ اینو نادے مچ آ قوم پاکستان نا فوج انا ہمو سپوت آتے خراج عقیدت پیش کیک ہرافک دا ملک انا بقاء و آجوئی کن جام شہادت نوش کریر ۔ اوپارے کہ حکومت و پاکستان نا فوج کشمیر نا ویل و دہشت گردی نا برخلاف اسہ پنہ غاٹو، دہشت گردی ءِ کنٹرول کننگ کن حکومت و پاکستان نا فوج نیشنل ایکشن پلان آ عمل کننگ ءُ ۔ پاکستان نا فوج دہشت گردی نا برخلاف جنگ اٹی و پاک سرزمین نا رکھ اکن اخس کہ قربانی تسر اوفتا اقوام عالم اٹ مٹ ملیپک ۔ پاکستان کشمیری ایڑھ ایلم تتون و ہمیشہ جہد آجوئی اسکان اوفتے تون سلک مودی نا ظلم و بربریت نا پالیسی زوت نیست ونابود مریک ۔ چیئرمین سینیٹ پارے کہ اسہ وار ولدا نن تینا فوج انا سپوت آتے اوفتا قربانی و جیرت و بہادری آ سلام پیش کینہ و اینو نادے انا مناسبت اٹ ننے سیوت ویگانگت ، ملکی و کشمیر نا رکھ انا عزم انا اعادہ ءِ کروئی مریک و بانی پاکستان محمد علی جناح ;231; نا وژن نا رداٹ ملک و قوم انا شونداری و شونہالی و سالمیت کن ننے یک جان مرسا کاریم کروئی مریک ۔
