اسلام آباد ۔ 06 ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم و پاکستان نا فوج دنیا ءِ کلہو تننگ ءُ کہ کشمیر نا ویل انا ایسری آن ہی ڈیہہ ٹی امن مریک ، ننا ورناک امن کن تینا جان تے ندر کریر، اینو شہید و غازی تے خراج تحسین پیش کننگ نا دے ءِ ۔ او جمعہ نادے آ لیفٹیننٹ ارسلان عالم شہید نا اُراٹی شہید انا درجہ غاتا بڑزی کن دعا غان پد صحافی تتون گپ و تران کریکہ ۔ ڈاکٹر فردوس عاشق اعوان پارے کہ پاکستان ہمووخت اسکان سوگو مننگ کپک ہراوخت اسکان کشمیر آجو مفک ۔ اوپارے کہ کشمیری اسہ تُو آن زیات وخت آن بھارت نا بندی جوڑ ءُ، ہراوخت اسکان ظلم انا مون انگا نن چٹپک پاکستان نا حکومت ، الس و فوج کشمیری تتون سلوک ءِ ، ننا شہید آتا لمہ، ایڑھ و مسڑ تا حوصلہ و عزم بلند ءِ ۔ اوپارے کہ شہید آتا خاہوت آتا جوزہ غاک ہُننگ نا قابل ءُ ۔ ننے اوفتیا گمر ءِ، ہراوخت اسکان وطن کن دا جوزہ غاک اریر ہچ کس ننے ہچ کننگ کپک ۔
