اسلام آباد ۔ 06 ستمبر (اے پی پی) صدر مملکت ڈاکٹر عارف علوی فاشٹ مودی بھارتی سرکڑدہ غاتا مقبوضہ کشمیر اٹی انسانی حق انا خلاف ورزی تیا عراق نا اصولی موقف نا ستاءِ کرسا پارینے کہ پاکستان سلامتی کونسل نا قرارداد آتا رداٹ تنازعہ کشمیر نا پرامن ایسری نا کوشست آتا بابت غٹ جہانی فورم تیا عراق نا پدریسہ مخ تفی نا اومیت تخک ۔ اوداہیت ءِ عراق نا دزکش مروک آ سفیر ڈاکٹر علی یاسین الرحمانی تون گپ و تران کرسا پارے ہرا جمعہ نادے آ ایوان صدر اٹی اوڑتون سپاروکی اوڑدہی کرے ۔ صدر عراق نا اسلامی سپریم کونسل نا سروک شیخ جمودی نا جولائی 2019ء ٹی کشمیر نا دورہ نا ہم ستاءِ کرے ۔ صدر پارے کہ پاکستان و عراق نا نیام اٹ اسیجا عقیدہ ، دودوربیدگ و تاریخی رشتہ غاتا سوگو بنداو تیا خڑکی و خوشگوار تعلقداری ءِ ۔ اوپارے کہ پاکستان عراق نا وتواجہی ، سیاسی یکجہتی و علاقائی سالمیت نا پبی مخ تفی ءِ کرے ۔ اوداہیت آ زور شاغا کہ پاکستان ہروڑنا دہشت گردی نا مذمت ءِ کیک و او عراق اٹی داعش کون آ دہشت گرد تنظیم تا بیدادی و دہشت گردی نا کارروائی تا پبی مخالفت ءِ کرے ۔ اوپارے کہ پاکستان پائیدار امن و آشتی نا کوشست آتے ٹی عراق نا حکومت و عراق نا الس تون سلیس و تینا مالیاتی منتظمین ، انجینئرز ، آئی ٹی چاہندار، ڈاکٹر و طبی عملہ غان بیدس کسب کار و نیم کسب کار افرادی قوت ءِ پوسکن جوڑ جاڑ نا سرجزآتے ٹی بشخ ہلنگ کن عراق آ گدریفنگ نا پیش کش کرے ۔ اودزکش مروک آ سفیر ءِ پاکستان اٹی سفارتی مد انا سرسہب پوروی آ مبارکبادی ترسا ہڑتوم آ کنڈآتا تعلقداری تا مون آ دننگ کن کوشست و مقبوضہ کشمیر نا مظلوم الس کن اونا اصولی مخ تفی نا ستاءِ کرے ۔ سفیر شاندار مہمان نوازی و پاکستان اٹی خوشگوار اڈکننگ کن پاکستان نا حکومت و الس نا کمک نا منت واری ءِ ہرفے ۔
