فیڈرل بورڈ آف ریونیو ٹی اصلاحات و ادارہ ٹی وڈی خوری تا چٹفنگ حکومت نا اولیت ءِ، الس و واپاری برادری نا پت ءِ بحال کننگ کن مارکیٹ آتا دورہ ءِ کروک آ ایف بی آر نا غٹ ٹیمک شخصی اوڑدہی سے نا وخت آ ریکارڈ مرتب کننگ ءِ المی کیر، وزیراعظم عمران خان نا پارت
اسلام آباد ۔ 05 ستمبر (اے پی پی) وزیراعظم عمران خان فیڈرل بورڈ آف ریونیو (ایف بی آر) اٹی اصلاحات و ادارہ ٹی وڈی خوری تا چٹفنگ ءِ حکومت نا اولیت گوندسا پارت کرینے کہ الس و واپاری برادری نا پت ءِ بحال کننگ کن مارکیٹ آتا دورہ ءِ کروک آ ایف بی آر نا غٹ ٹیمک شخصی اوڑدہی نا وخت آ ریکارڈ جوڑ کننگ ءِ المی کیر ۔ اوداپارت ءِ فیڈرل بورڈ آف ریونیو نا کارکڑدگی و ایف بی آر اٹی اصلاحات نا بابت پنچ شنبے نادے دیوان نا کماشی ءِ کرسا تس ۔ چیئرمین ایف بی آر وزیراعظم ءِ تدوک آ اسہ سال انا کارکڑدگی و اصلاحات نا بابت سرجم بریفنگ تس ۔ وزیراعظم ءِ پاننگاکہ اینخو مالی سال اگست اسکان 579 ارب روپئی ریونیو یکجا کننگانے ہراکہ خدوناسال انا مقابلہ ٹی 14;46;65درسد ودکی ظاہر کیک، وزیراعظم ءِ پاننگاکہ اینخو نا سال فائلرز آتا کچ اٹی 7 لکھ 83 ہزار آن زیات بندغ نا ودکی مسنے ۔ وزیراعظم ءِ پاننگاکہ 2017 ء ٹی دا کچ 1514817 ئس ہراکہ داسہ 2561099اسکان سرمسنے ۔ وزیراعظم ءِ پاننگاکہ ڈومیسٹک ٹیکس ہلنگ اٹ 28 درسد ودکی خننگانے ۔ وزیراعظم ءِ الس نا ایف بی آر آ پت ءِ بحال کننگ و کمکاری نا رداٹ چست کروک آ گام گیج آتیا ہم سرجم حوال تننگا ۔ وزیراعظمءِ پاننگاکہ رجسٹریشن ، خراج سرٹیفکیٹ نا جاری کننگ، خراج ریٹرن جمع کرفنگ و آڈٹ آتون اوار غٹ مرحلہ غاتے خودکار و کمپیوٹرائزڈ کننگ انگ ءِ تانکہ دا مچ آ عمل اٹی ایف بی آڑ نا کارندہ غاتیان شخصی ڑاٹ رابطہ ءِ برجاء کننگ نا گرج ءِ چٹفنگ مرے ۔ وزیراعظم ءِ پاننگاکہ الس نا آسراتی کن ایف بی آر نا کنڈآن ’’معلومداری‘‘ و نادرا نا اواری اٹ ’’آسراتی‘‘ ویب پورٹل اس جاری کننگانے تانکہ ہر بندغ ءِ جتا محکمہ غاتا کنڈآن ایف بی آر ءِ ملوک آسرجم آک آن لائن و آسانی اٹ دوبننگ کیر ۔ وزیراعظم ءِ پاننگاکہ الس نا غاوتا ازالہ کن آن لائن نظام ءِ پین گچین کننگانے تانکہ ایف بی آر نا کارندہ غاتا بابت غاو تا دمدستی ازالہ ءِ کننگ مرے ۔ واپار اٹی آسراتی تننگ نا بابت ایف بی آر نا گام گیج آتیا حوال ترسا پاننگاکہ تدوک آ سال تیٹی زیر التواء 16ارب روپئی نا ریفنڈ آتے واپس کننگانے وخت اس کہ 17 ارب داتُو انا ایسر اسکان جاری کننگک ۔ دوکاندار و ریٹیلرز (پرچون) کن خراج سسٹمءِ پین آسان کننگ انگ ءِ ، خراج گزار آتا آسراتی کن ’’خراج آسان‘‘ نا پن اٹ موبائل ایپ اس جاری کننگانے ۔ خراج نا فارم تا اردو ٹی ترجمہ ءِ کننگانے و ایف بی آرنا ویب ساءٹ ءِ ہم اردو ٹی جوڑ کننگ آ کاریم کننگ انگ ءِ ۔ داکان بیدس ایکٹیو خراج گزار آتا فہرست ءِ باقاعدگی اتون اپ ڈیٹ کننگک تانکہ دارداٹ خراج گزار آتے ہچ وڑنا مشکل مف ۔ واپار اٹی کمکاری نا بابت گام گیج آتیا پاننگاکہ ’’برآمدآتے آسان‘‘ اسکیم نا رداٹ برآمد آتے آسان کننگ انگ ءِ ، جتا کسٹم اسٹیشن تیا سکینر خلنگانے، طور خم بارڈر آ کسٹم نا آسراتی 24گھنٹہ فراوان کننگانے، کرتارپور راہداری آ کسٹم آپریشنز بروک آ منہ ہفتہ ٹی بناکننگک ۔ موبائل فون تا سمگلنگ نا توننگ نا بابت پاننگاکہ پیشن آن اتوک آ غٹ موبائل فون تا آن لائن رجسٹریشن بھلا بالی پٹ آتیا کرنسی ظاہر کننگ نا رداٹ ’’کرنسی ڈکلیئر سسٹم ‘‘ و ایڈوانس پسنجرز انفارمیشن سسٹم و الس اٹی سمگل شدہ گڑاتا بابت آگاہی فراوان کننگ کن ایف بی آر نا ٹیم تا کنڈآن جتا مارکیٹ آتا دورہ ءِ کننگ انگ ءِ ۔ داوخت آ وزیراعظم پارے کہ ایف بی آر اٹی اصلاحات و ادارہ ٹی وڈی خوری نا چٹفنگ حکومت نا اولیتءِ ۔ اوپارے کہ ایف بی آر الس نا پت انا بحالی آن خراج نیٹ ءِ وسیع کننگ اٹ خاطر خواہ کمک ملک ۔ وزیراعظم پارت کرے کہ الس و واپاری برادری نا پت ءِ بحال کننگ کن المی ءِ کہ مارکیٹ آتا دورہ ءِ کروک آ ایف بی آر نا غٹ ٹیمک شخصی اوڑدہی سے نا وخت آ ریکارڈ مرتب کننگ ءِ المی کیر ۔
