ہڑتوم آ کنڈآتا تعلقداری، مقبوضہ جموں و کشمیر نا حالیت آتون اوار اہم تین پہ تینی است خواہی نا معاملہ غاتیا گپ و تران
کڑدہ غاتا پاکستان و عمان نا جغرافیائی خڑکی نا رادٹ اقتصادی و واپاری کمکاری ءِ مون آ دننگ آ امنا
اسلام آباد ۔ 05 ستمبر (اے پی پی) پاکستان و عمان جغرافیائی خڑکی نا رداٹ اقتصادی و واپاری کمکاری ءِ مون آ دننگ آ امنا کرینو ۔ دا امنائی وزیر خارجہ شاہ محمود قریشی و سلطنت عمان نا مجلس شوریٰ نا چیئرمین خالد بن ہلال ناصر المعوالی نا کماشی ٹی عمان نا مجلس شوریٰ نا 10 باسکی ڈل انا نیام اٹ ہیت وگپ اٹی مس ہراپنچ شنبے نادے وزارت خارجہ ٹی اوڑتون اوڑدہی کریر ۔ اوڑدہی ٹی ہڑتوم آ کنڈآتا تعلقداری، مقبوضہ جموں و کشمیر نا حالیت آتون اوار اہم تین پہ تینی است خواہی نا معاملہ غاتیا گپ و تران کننگا ۔ کڑدہ غاک پاکستان و عمان نا نیام اٹ جغرافیائی خڑکی نا رداٹ ، اقتصادی و واپاری کمکاری ءِ مون آ دننگ آ امنا کریر ۔ وزیر خارجہ پارے کہ پاکستان و عمان اقتصادی رابطہ غاتا کمک اٹ ہڑتوم آ کنڈآتا کمکاری ءِ پوسکن آ بڑزی آ دننگ کیرہ ۔ اوپارے کہ جہانی کہول آ چندی فورم تیا ہڑتوم آ ملک آتا نکتہ نظر اٹی مماثلت ءِ ۔ وزیر خارجہ داوخت آ تینا دورہ عمان و اونا کماشی ٹی اڈ ہلوک اسیجائی وزارتی کمیشن (جے ایم سی) نا دیوان نا ذکر ءِ کرسا پارے کہ جے ایم سی ٹی پک کروک آ ہدف آتے ہم زوت اولیتی بنداو تیا پورو کننگک ۔ وزیر خارجہ ڈل انا باسک آتے مقبوضہ کشمیر نا تشویشناک حالیت آتیان معلومدار کرے و پارے کہ لکھ آ کودک کشمیری تے بھارتی بیدادی آن نجات ترفنگ کن مچ آ جہانی برادری خاص کر مسلم دنیا ءِ تینا کڑد ءِ ادا کروئی مریک ۔ کشمیر اٹی پدریسہ انسانی حق انا خلاف ورزی تیا انسانیت نوحہ کناں ءِ ننا موقف پیدوار ءِ کہ کشمیر نا ویل ءِ اقوام متحدہ نا قرارداد آتا رداٹ ایسر کننگے ۔ پاکستان عمان کن وسط ایشیائی ریاست آتسکان رسینگ کن گیٹ وے نا حیثیت تخک ۔ چیئرمین مجلس شوریٰ عمان داوخت آ پارے کہ ہڑتوم آ ملک آتا نیام اٹ جہانی کہول آ مثالی کمک اسہ ایلو آ پت انا درشان ءِ ظاہر کیک ۔ عمان نا پارلیمانی ڈل مقبوضہ جموں و کشمیر نا حالیت آتیا گڑتی نا درشانی ءِ کرسا پارے کہ ڈیہہ ٹی امن نا کمک اٹ شونداری نا تغ ءِ پورو کننگ مفک ۔ عمانی ڈل پارے کہ عمان ویل و تنازعہ غاتے مذاکرات نا کمک اٹ پرامن وڑاٹ ایسر کننگ آ باورکیک ۔
