کوءٹہ ۔ 05 ستمبر (اے پی پی)صوبائی وزیر خزانہ ظہور احمد بلیدی پارینے کہ بلوچستان نا شونداری ٹی زالبول آتا کڑد آن نہ من مننگ کپک، وزیراعلیٰ جام کمال نا کماشی ٹی جوڑ صوبائی حکومت زالبول آتے واکدار کننگ و اوفتا ویل آتا ایسری کن سنجیدہ ءِ ۔ داہیت ءِ او پنچ شنبے نادے آ ہندی ہوٹل وویمن اکنامک ایمپاورمنٹ کونسل نا لانچنگ سرمنی آن تران کرسا کرے ۔ داوخت آ پارلیمانی سیکرٹری ترقی نسواں و کانود ماہ جبین شیران، سیکرٹری شونداری نسواں سائرہ عطاء، سیکرٹری لائیو اسٹاک دوستین جمالدینی ، ہوم نیٹ ورک پاکستان ، یو این وویمن و سول سوساءٹی نا نمائندہ، وویمن چیمبر آف کامرس تون اوار زالبول آتا بھلو کچ اس ہم ساڑی ئسر داوخت آ مسہ یات داشت آتیا دستخط ہم کننگا ۔ صوبائی وزیر خزانہ ظہور بلیدی پارے کہ زالبول آتے کن انڈومنٹ فنڈ انا ٹہیفنگ کن گام گیج چست کننگ انگ ءِ مستین اٹی محکمہ شونداری نسواں ءِ گوجالنگا ولے ساڑی صوبائی حکومت زالبول آتے واکدار کرسا اوفتے شونداری نا دوڑ اٹی اوار کن سنجیدہ ءِ و محکمہ شونداری و نسواں ءِ فنڈ آتا جاری کننگ تون اوفتے اودے ایلو محکمہ غاتا بریبر اتنگ کن دیانت داری اٹ کاریم برجاءِ انتئے کہ بلوچستان نا شونداری ٹی زالبول نا اہمیت مسلمہ ءِ و اینو مسہ ایم او یو آ دستخط مسنے ہنداخاطران اینو نادے بلوچستان نا زالبول آتے کن تاریخی دے اسے نا حیثیت تخک دود آن تران کرسا پارلیمانی سیکرٹری شونداری نسواں و کانود ماہ جبین شیران پارے کہ ساڑی مالی سال انا صوبائی پی ایس ڈی پی ٹی محکمہ شونداری نسواں کن بھلو زراس تخنگانے ہرانا کریڈیٹ بلوچستان عوامی پارٹی نا سروک وزیراعلیٰ بلوچستان جام کمال خان آ کاہک انتئے کہ مستین نا حکومت آک دا محکمہ ءِ بھاز بے وڑ گوجالار و صوبہ نا اہم معاملہ غاتے ٹی زالبول آتا سلہ ءِ اہمیت تتوس ولے ساڑی صوبائی حکومت زالبول آتے حقی وڑاٹ واکدار کننگ کن گام گیج کننگ ءِ و وزیراعلیٰ بلوچستان غٹ معاملہ غاتے ٹی زالبول اسمبلی نا باسک آتا رائے نا اہمیت تننگ تون اوفتے راج انا اہم اسٹیک ہولڈر نا حیثیت اٹ کلیدی اہمیت تننگ ءِ ۔ اوپارے کہ معاشی وڑاٹ زالبول آتے سوگو کرسا واکدار کننگ مریک بجٹ اٹی بھلو زر اس تخنگ آن پد ہم صوبہ ٹی ڈلیوری نا کیس آتے ٹی زالبول آتا مرک واقع مریک وخت اس کہ کم وئی ٹی نیاڑی تا برام نا سوب آن او راج انا شونداری نا جاگہ غا بیرہ اُرانا زند اسکان سلرہ ہنداخاطران طالبات و زالبول آتا کم وئی ٹی برام تا بابت کانود سازی نا سخت گرج ءِ انتئے کہ وخت اس کہ وونٹ بٹنگ و ڈیورنگ لیسن کن وئی نا حد 18 سال مقرر کننگانے تو زالبول آتا برام کن ہم وئی نا حد 18 بایدے مرے انتئے کہ کم وئی ٹی برام کروک آ نیاڑی خداداد لاءخی تیان پد ہم راج انا شونداری ٹی تینا کڑد ءِ ادا کننگ کپک ۔
