مقبوضہ کشمیر نا حالیت آک بھاز خراب ءُ، پاکستان ہر کہول آ کشمیر نا ویل ءِ تالان کرسا کیک، سلیم مانڈوی والا

اسلام آباد ۔ 05 ستمبر (اے پی پی) ڈپٹی چیئرمین سینیٹ سلیم مانڈوی والا مقبوضہ کشمیر نا الس تون یکجہتی نا درشانی ءِ کرسا پارینے کہ مقبوضہ کشمیر نا حالیت آک بھاز خراب ءُ ۔ پنچ شنبے نادے جاری کروک اسہ بیان اسے ٹی سلیم مانڈوی والا پارے کہ مقبوضہ کشمیر اٹی اسہ تُو آن کرفیو خلوک ءِ ۔ کشمیری الس آ ظلم و ستم کننگ انگ ءِ ۔ اوپارے کہ مقبوضہ کشمیر اٹی کشمیری تا نسل کشی ءِ کننگ انگ ءِ ۔ اوجہانی برادری آ زور شاغا کہ او مقبوضہ کشمیر نا حالیت آتا نوٹس ءِ ہلے ۔ مودی سرکار کشمیری تیا ظلم و ستم ءِ بند کے ۔ اوپارے کہ پاکستانی الس کشمیری تتون پورو یکجہتی نا درشانی ءِ کیک و پاکستان ہر کہول آ کشمیر نا ویل ءِ تالان کرسا کیک ۔