اسلام آباد ۔ 05 ستمبر (اے پی پی) صدر مملکت ڈاکٹر عارف علوی پارینے کہ بھارت نا نیو کلیئر سلہہ فاشٹ بھارتی سرکڑدہ غاتا دوٹی ءِ ہراڑان ڈیہہ تون اوار اوار مچ آ دنیا نا امن ءِ خطرہ ءِ، پاکستان مقبوضہ جموں و کشمیر اٹی بھارت نا اسہ کنڈی غیر کانودی گام گیج آتے یکسر مسترد کرینے، دا گام گیج آک اقوام متحدہ نا سلامتی کونسل نا قرارداد آتا چپ ءُ، جہانی برادری ءِ کشمیری تے اوفتا حق خودارادیت ترفنگ کن کڑد ادا کروئی مریک ، عمان کشمیر نا الس کن او آئی سی نا مخ تفی ءِ سوگوی تننگ کن بایدے کوشست کے ۔ پاکستان عمان تون برادرانہ تعلقداری تے غٹ بشخ آتے ٹی ودفنگ خواہک ۔ او سلطنت عمان نا مجلس شوریٰ نا چیئرمین شیخ خالد بن ہلال المعوالی تون گپ و تران کریکہ ہرافک پنچ شنبے نادے آ داڑے ڈل اتون اوار اوڑتون اوڑدہی کریر ۔ قومی اسمبلی نا اسپیکر اسد قیصر ہم داوخت آ ساڑی ئس ۔ صدر مملکت پارے کہ بھارت نا فاشٹ حکومت ہرا مہالو گجرات اٹی لس خون اٹی ہم اوار مسنے داسہ او جوہری بٹن اسکان رسینگ تون علاقائی و جہانی امن ءِ خطرہ ٹی شاغانے ۔ اوپارے کہ پاکستان بھارت نا 5 اگست نا غیر کانودی گام گیج آتے سختی اٹ مسترد کرینے ہرافتا کمک اٹ او مقبوضہ جموں و کشمیر نا متنازعہ حیثیت ءِ اسہ کنڈی وڑاٹ بدل کننگ نا کوشست کرینے ۔ دا گام گیج اقوام متحدہ نا سلامتی کونسل نا قراردا د آتا برخلاف ءِ ۔ صدر مملکت پارے کہ بھارت نا جموں و کشمیر ءِ تہہ نا معاملہ اس گوندنگ نا معاملہ سہی اف، اونا اقوام متحدہ نا سلامتی کونسل نا ساڑی دیوان اٹی تصدیق مسنے ۔ اوپارے کہ ہرمسلمان کودک کشمیری تا بایدے ڈکھ ءِ محسوس کے ہرا بھارتی کوزہ گر فوج انا کنڈآن اسہ تُوآن زیات وخت آن کرفیو و انسانی زند انا بنداوی گرج آتا مفننگ کون آ انسانی حق انا خلاف ورزی تا گواچی ءُ ۔
