بھارت نا فاشٹ حکومت ڈیہہ تون اوار اوار مچ آ دنیا نا امن ءِ خطرہ ٹی شاغانے، صدر مملکت ڈاکٹر عارف علوی

اسلام آباد۔ 04ستمبر (اے پی پی) صدر مملکت ڈاکٹر عارف علوی پارینے کہ بھارت نا فاشٹ حکومت ڈیہہ تون اوار اوار مچ آ دنیا نا امن ءِ خطرہ ٹی بٹینے، جہانی برادری کشمیر نا ویل انا ایسری ٹی تینا کڑدءِ ادا کے ہراڑے کوزہ گر فوج انا کنڈآن انسانی حق انا سنگین خلاف ورزی کننگ انگ ءِ، پاکستان اسہ پرامن ءُ ملک اسے و او جہانی امن کن بے پناہ قربانی تسنے۔ او فلسطین، روس، پرتگال، آسٹریلیا و قزاخستان نا پندار سفیر و ہائی کمشنر آتون گپ و تران کریکہ ہرافک چارشنبے نادے آ داڑے ایوان صدر اٹی اوڑتون اوڑدہی کریر۔ پندار سفیر و ہائی کمشنر آک ایوان صدر اٹی اسہ دود اسے ٹی صدر مملکت ءِ تینا سفارتی سند آتے پیش کریر۔ اوکان پد اوفک صدر مملکت تون جتا جتا اوڑدہی ہم کریر۔ داوخت آ صدر مملکت پارے کہ پاکستان غٹ سنگت ملک آتون تینا تعلقداری تے پین سوگو کننگ خواہک۔ اوجہانی برادری آ زور شاغا کہ او کشمیر نا ویل انا ایسری کن تینا کڑد ءِ ادا کیر۔ مقبوضہ کشمیر اٹی بھارتی کوزہ گر فوج انا کنڈآن انسانی حق انا خلاف ورزی کننگ انگ ءِ۔ صدر مملکت پارے کہ پاکستان اسہ پرامن ءُ ملک اسے و او جہانی امن کن بے پناہ قربانی تسنے۔ اوپارے کہ بھارت نا فاشٹ حکومت ڈیہہ تون اوار اوار مچ آ دنیا نا امن ءِ خطرہ ٹی شاغانے۔ صدر مملکت پارے کہ اینو پاکستان اٹی زرکاری و واپار کن چاگڑد بے کچ سازگار ءِ۔ اومیت ءِ کہ داملک آتا زرکار آک پاکستان اٹی زرکاری و واپار نا وارخواہی تیان فائدہ ہرفرہ۔ اوہڑتوم آ کنڈآتا ڈل آتاہن و بر نا گرج آ ہم زور شاغاوپارے کہ دا السی کہول انا رابطہ و سوگو سیاسی و اقتصادی تعلقداری تیکن المی ءِ۔ صدر مملکت پوسکن تعینات سفیر و ہائی کمشنر آتے مبارکبادی تس ودا اومیت نا درشانی ءِ کرے کہ ہڑتوم آ کنڈآتا تعلقداری تے پین سوگو کننگ کن کاریم کیرہ۔ داوخت آ فلسطین نا سفیر احمد جواد امین رابی، روسی فیڈریشن نا سفیر ڈینیلا وکٹورووچ گانچ، پرتگال نا سفیر پانیویز، آسٹریلیا نا ہائی کمشنر ڈاکٹر جیفری شا و قزاخستان نا سفیر اکان رحمتلعین تینا سفارتی سند آتے صدر مملکت ءِ پیش کریر۔ داکان مست پوسکن تعینات سفیر و ہائی کمشنر آتے ایوان صدر نا مرکزی گیٹ اسکان بگھی ٹی اتنگا۔ داوخت آ پاکستان و تعلقدار ملک آتا قومی ترانہ ءِ ہم خلنگا۔ پندار سفیر آتے گارڈ آف آنر ہم پیش کننگا۔