پاک فوج انا شعبہ تعلقات عامہ نا ڈائریکٹر میجر جنرل آصف غفور نا میڈیا ءِ بریفنگ

کشمیر جہانی کہول آ انسانی حق انا بدترین خلاف ورزی نا ویل جوڑ مسنے
خصوصی حیثیت ءِ بدل کننگ نا مسخت مقبوضہ کشمیر نا ڈیموگرافی ءِ بدل کننگ نا ءِ
کشمیری تے کلہو ایتنہ کہ آجوئی نا جہد اٹی اوفتے تون تفوک اُن
راولپنڈی۔ 04ستمبر (اے پی پی) پاک فوج انا شعبہ تعلقات عامہ (آئی ایس پی آر) نا ڈائریکٹر میجر جنرل آصف غفور پارینے کہ کشمیر جہانی کہول آ اسہ تنازعہ سے، نن اونا پرامن ایسری ءِ خوانہ، کشمیر پاکستان و بھارت نا نیام اٹ نظریاتی یاجغرافیائی اف بلکن انسانی حق انا جہانی ویل جوڑ مسنے ہرانا ایسری المی ءِ، کشمیری 72سال نا بدترین ظلم و ستم آن گدرینگ انگ ءُ۔ نن کشمیر کن آخیری سم، آخیری سپاہی و آخیری حد اسکان کانہ، پاکستان نا کوشست آک بھارت نا 5 اگست نا گام گیج نا پدی اسکان محدود افس، ننا ہرا کہ گام ہرا بھارت نا حق اٹی اِنپ او کشمیری تتون غداری ءِ، کشمیری تے کلہو ایتنہ کہ آجوئی نا جہد اٹی نم تون سلوک اُن، بھارت کشمیری تا جہد ءِ دہشت گردی تون گنڈنگ نا کوشست کرینے، گڑاس مخلوق سوشل میڈیا غا من گھڑت ہیت کیرہ، کشمیر نا ویل آ امریکہ تون ہچ ءُ ڈیل اس متنے، آرمی چیف جنرل قمر جاوید باجوہ نا ملازمت نا مد اٹی ودکی خواتونہ، وزیراعظم ساڑی حالیت آتا رداٹ اودے ودکی تس۔ چارشنبے نادے میڈیا ءِ بریفنگ ترسا ڈی جی آئی ایس پی آر پارے کہ تنازعہ کشمیر نا ایسراقوام متحدہ نا سلامتی کونسل نا قرارداد آتا رداٹ بایدے مرے، بھارت اٹی انتہاپسند آرایس ایس و نازی سوچ انا سوب آن 22کروڑ اقلیت آتے خطرہ ءِ، ننا جہد کشمیری تا حق خودارادیت نا دوئی کننگ نا ءِ، آرٹیکل 35اے و آرٹیکل 370 نا ساڑی گری آن نئے تو کشمیری تے ریلیف اس دوئی ئس و نئے دانا چٹفنگ آن بھارتی ظلم و ستم کم مسنے، پاکستان ہروڑنا حالیت آتون مون تننگ کن تیار ءِ، پاکستان جہانی برادری ءِ بیدار کننگ نا کوشست کننگ ءِ، پاکستان دُن ءُ ہچ ءُ گام اس ہرفپک ہراڑان جہانی امن خطرہ ٹی تمے، مقبوضہ کشمیر نا بہادر الس ءِ دا کلہو ءِ کہ آجوئی نا دا جہد اٹی نن نم تون سلوک اُن۔ اوپارے کہ نن کشمیری تتون سلوک ئسن، سلوک اُن و سلنہ، کشمیری تینا روا حق خودارادیت ءِ ہرحال اٹ ہلیرہ۔ آجوئی نا جہد مریس ءِ۔ اوپارے کہ مودی نا دا کوشست مریک کہ او تینا ظلم و ستم ءِ ودفے تانکہ ردعمل ءِ دہشت گردی گوندنگ مرے۔ اوپارے کہ اوغانستان اٹی 40 سال آن جاری بدامنی نا پاکستان آ ہم اثر تما، پاکستان امن کن پبی کوشست کرے و ساڑی آ امن عمل ءِ ہم پاکستان نا پبی مخ تفی دوئی ءِ، اوغانستان اٹی بدامنی نا سوب آن ننا 2لکھ فوجی اوغان سیم آ تعینات ءُ۔ اوپارے کہ نن آخیری گولی، آخیری ورنا و آخیری حد اسکان کانہ، داسہ دا بھارت و جہانی برداری آ منحصر ءِ کہ او بھارتی گام گیج آتے ہراوڑ ہلیک۔ اوپارے کہ آر ایس ایس و نازی سوچ بھارت اٹی گاندھی نا خون ءِ کریر، بابری مسیت ءِ شہید کریر و گجرا ت اٹی مسلمان تا لس خون ءِ کریر، ہموڑے مذہبی و راجی آجوئی خطرہ ٹی ءِ۔ اوپارے کہ بھارت ننا چکار ءِ دہشت گردی آن اسہ کنڈ کننگ کن تینا سیم تیا گڑبڑ کرے، اوکان پد ہم نن چیلنج آتا مقابلہ ءِ کرین و نئے بیرہ تینا ملک بلکن ڈیہہ ٹی امن کن پبی کڑد ادا کرین، وزیراعظم پارے کہ مقبوضہ کشمیر اٹی ساڑی بھارتی گام گیج اسہ پوسکن ءُ جنگ اس بناکننگ کن بنداو مننگ ءِ، وزیراعظم مخلصانہ وڑاٹ امن کن ہیت و گپ انا پیش کش کرے ولے اونا نتیجہ ٹی بھارت جنگی جہاز مون تس، داسہ وزیراعظم پیدوار پڑو کرینے کہ بھارت تون ہچ ءُ ہیت وگپ اس مفک۔ وزیراعظم پارینے کہ پاکستان زموار ریاست اسے، اِراجوہری طاقت آتا نیام اٹ جنگ انا گنجائش مفک، بھارت کلبھوشن یادیو نا دروشم اٹ پاکستان آ باواسطہ حکمت عملی اٹ جلہو کرے، دہشت گردی آن پاکستان ءِ جانی و مالی نسخان مس، اوکان پد ہم پاکستان امن کن پبی کڑد ادا کرے۔ اوپارے کہ ہر ملک انا فوج اونا سلامتی نا محافظ مریک۔ اوپارے کہ اگہ اوغانستان اٹی امن مریک تو داڑے ساڑی ننا فوج کم مریک۔ بھارت دا سجفنگ ءِ کہ اگہ دا فوج دیکی سیم آن اسہ کنڈ مس تو بھارت کن خطرہ مننگ کیک۔ اوپارے کہ 20 سال انا جنگ پاکستان نا معیشت آ خراب ءُ اثر مرتب کرینے، بھارت سجفک کہ داوخت ءِ کہ ہندن ءُ کاریم اس کین کہ پاکستان تینے سنبھالنگ کپ۔ اوپارے کہ بھارت داہیت ءِ مون آ تخے کہ جنگ آک بیرہ سلہہ و سوگو معیشت تون کننگپسہ بلکن اوڑکن حب الوطنی، الس نا سیوت و سپاہ نا جوزہ المی ءِ، بھارت 27 فروری نا انجام ءِ یات تخے، اگہ ہندن ءُ حرکت اس کیک تو 27 فروری آ سبخ اس تروک آ ننا ورناک تیار تولوک ءُ۔ اوپارے کہ کشمیر جہانی کہول آ امنا مروک تنازعہ سے۔ کشمیری تا تکلیف آن پد ہم پاکستان کشمیر نا پرامن ایسری کن کوشست کرینے، 72سال آن بدبختی اٹ جہانی برادری داکنڈآ داخہ چکار کتو اخس حق ئس۔ اوپارے کہ بھارت نا کنڈآن 5 اگست نا گام گیج آن پد مقبوضہ کشمیر اٹی انسانی حق انا خلاف ورزی تیٹی ودکی مسنے، داسہ دا ویل پاک۔ بھارت نظریاتی یا جغرافیائی سلتوبلکن جہانی کہول آ انسانی حق انا خلاف ورزی نا بدترین ویل جوڑ مسنے ہرادے ایسر مننگ المی ءِ۔ اوپارے کہ کشمیر نا خصوصی حیثیت ءِ چٹفنگ نا بھارتی مسخت داجاگہ نا ڈیموگرافی ءِ بدل کننگ ناءِ، 72سالہ ظلم و ستم نا ساڑی آ انتہاءِ، ہسپتال، اسکول آک بند ءُ، میڈیا نا بلیک آؤٹ ءِ، سیاسی سرکڑدہ غاک دزگیر ءُ، بھارت تینا اپوزیشن ءِ ہم کشمیر نا دورہ ءِ کننگ کن الیتو۔