اسلام آباد۔ 04 ستمبر (اے پی پی) وزیر داخلہ اعجاز شاہ پارینے کہ وزیراعظم عمران خان کشمیر کاز اکن اخس کہ کاریم کرے داخس ہچ کس کتنے، جہانی برادری ءِ کشمیر نا ویل آ ردعمل ءِ نشان تروئی مریک، کالعدم تنظیم تا برخلاف پاکستان بھاز گام گیج کرینے، ضرورت مس تو پین کینہ۔ داخیال آتا درشانی ءِ او عرب نیوز ءِ تروک آ اسہ انٹرویو اسے ٹی کرے۔ اوپارے کہ ایف اے ٹی ایف نا گام گیج آک پاکستان نا فائدہ ٹی ءُ۔ دنیا ٹی ہچ ءُ جاگہ اس دُن مفک کہ اسہ علاقہ سے ٹی اسہ وارلارڈ اسے نا رٹ مرے و ایلو علاقہ ٹی پین اسٹ نا۔ وزیر داخلہ پارے کہ ایف اے ٹی ایف نا گڑاس گام گیج پاکستان کن فائدہ تروک ءُ، بھارت کوشست کننگ ءِ ایف اے ٹی ایف ءِ کاریم اٹ اتسا پاکستان ءِ بلیک لسٹ گوندنگ کے۔ اسہ سوج اسے نا ورندی ٹی اوپارے کہ پلی بارگین نیب انا کانود اٹی اوار ءِ۔ اگہ نواز شریف یا آصف علی زرداری ڈیل اس کننگ ءُ تو نیب اتون ہی کرور۔ وزارت داخلہ ہرا عمومی وڑاٹ ہندن ءُ ڈیل اسے نا بشخ مریک داڈیل اٹی اوار اف۔ اوپارے کہ پاکستان کالعدم تنظیم تا برخلاف مہالو آن ہی بھاز گام گیج ہلکونے۔ ضرورت تما تو کالعدم تنظیم تا برخلاف پین گام گیج ہم کینہ۔ اوپارے کہ مقبوضہ جموں و لداخ اٹی مسلم آبادی کم ءِ ہنداخاطران ہموڑے لاک ڈاؤن داخہ سخت اف وخت اس کہ مسلم اکثریتی کشمیر اٹی سخت پابندی و لاک ڈاؤن ءِ۔ جہانی برادری ءِ کشمیر نا ویل آ ردعمل نشان تروئی مریک۔ اعجاز شاہ پارے کہ اخس کہ وزیراعظم عمران خان کشمیر کاز اکن کاریم کرے داخس اسہ راہشون اس ہم کتنے۔ بھارتی جاسوس کلبھوشن یادو ءِ قونصلر رسینگ تننگ نا معاملہ غا گام جہانی عدالت انصاف نا فیصلہ غان پد ہرفنگا۔ مودی حکومت نا پنچ اگست نا گام گیج آتا سوب آن دا فیصلہ ءِ بدل کننگ کپنہ۔ اوپارے کہ ننے اسہ ہندن ءُ قوم اسے نا وڑاٹ کاریم کروئی ءِ ہرا دیانت دار ءِ۔ اگہ نن کشمیر نا حالیت آتا سوب آن کلبھوشن نا قونصلر رسینگ آ تینا فیصلہ ءِ بدلیفینہ تو ننے ٹی و مودی ٹی ہچ ءُ پرخ اس سلتوکہ۔
