لاہور۔ 04 ستمبر (اے پی پی) لاہور نا احتساب عدالت پیراگون ہاؤسنگ اسکینڈل کیس اٹی مسلم لیگی راہشون خواجہ سعد رفیق و سلمان رفیق آ فرد جرم ءِ بیٹ کرے۔ عدالت بروک آ سماعت آ گواہ تے شاہدی تیکن بٹنگا۔ احتساب عدالت نا جج جواد الحسن کیس انا سماعت ءِ کرے۔ سماعت نا وخت آ نیب سخت سیکورٹی ٹی خواجہ برادران ءِ عدالت اٹ پیش کرے، عدالت خواجہ برادران ءِ ریفرنس نا ساف نقل آتے فراوان کرے، خواجہ برادران نا وکیل فرم جرم بیٹ کننگ نا مخالفت ءِ کرے و دستاویز آتا جاچ ءِ ہلنگ کن ہفت دے انا مہلت خواہس۔ اوپارے کہ عدالت ءِ دا ہروئی ءِ کہ انت فرم جرم عائد کننگ نا کیس جوڑ ہم مریک یا آخا، آئین نا رداٹ کس اسے تینا سفائی نا پورو موقع تننگ آن بیدس سزا تننگ مفک، ہراڑاعدالت پارے کہ انت نن سزا اس تننگ اُن، داسہ تو فرد جرم عائد مروئی ءِ، عدالت ہڑتوم آ ایلم تیا فرد جرم عائد کرے، خواجہ برادران صحت جرم آن انکار کرسا نیب انادنگ ءِ چیلنج کریر۔ عدالت کیس انا مستی سماعت ءِ 13ستمبر اسکان ملتوی کرسا گواہ تے شاہدی تیکن بٹنگا۔ سماعت آن پد میڈیا تون گپ و تران کرسا خواجہ سعد رفیق پارے کہ کنا و کنا خاہوت نا جرم جمہوریت کن جہد ءِ، ٹرائل اٹی بے گناہی ءِ ثابت کینہ۔ خواجہ برادران ءِ کٹیا غان زیات میرات و پیراگون سٹی ٹی مبینہ وڑاٹ مالی فائدہ دوئی کننگ نا دوبہ غاتا مون تروک ءِ۔
