اسلام آباد۔ 03 ستمبر (اے پی پی) صدر مملکت ڈاکٹر عارف علوی پارینے کہ پاکستان مقبوضہ کشمیر اٹی انسانی حق آتا خلاف ورزی تے گوجالنگ کپک، پاکستان ہمیشہ تینا کشمیری ایڑھ ایلم تتون سلک، پاکستان ہائی کمشنرز و سفیر آک کشمیر نا ویل انا حقی منظر نامہ و ہموڑے بھارتی ظلم و بیدادی ءِ تالان کننگ کن پبی کاریم کیر، پاکستان جمہوریہ چیک اتون تینا تعلقداری تے بھاز اہمیت ایتک، جمہوریہ چیک اتون تینا تعلقداری و رابطہ غاتے پین سوگو کننگ نا است خواہی تخک۔ صدر مملکت داہیت ءِ سے شنبے نادے داڑے جمہوریہ چیک اکن پاکستان نا پندار سفیر محمد خالد جمیل تون ایوان صدر اٹی اوڑدہی ٹی کرے۔ صدر مملکت پارے کہ ہڑتوم آ ملک آتا نیام اٹ تعلقداری تے مون آ دننگ کن بڑزکو کہول انا رابطہ غاتے ودفوئی مریک۔ اوپارے کہ ہڑتوم آ ملک آتا نیام اٹ ہڑتوم آ کنڈآتا واپار نا کچ استعداد نا مقابلہ ٹی کم ءِ و داٹی ودکی نا بھلو گمان اس ساڑی ءِ۔ صدر پارے کہ جمہوریہ چیک انا پوریا گر و زرکارآک پاکستان اٹی واپار و کاروبار دوست پالیسی تیان فائدہ ہرفسا کانڑکنی، متبادل توانائی، ٹیکسٹائل نا بشخ اٹی اسیجائی ڈٹ، گاڈی تا تیاری، و بجلی نا پیدوار اٹی زرکاری نا وارخواہی تیان پبی فائدہ ہرفنگ کیرہ۔ صدر ڈیزائنر اشیاء تون اوار ویلیو ایڈڈ مصنوعات آتا کمک اٹ برآمد آتے ٹی ودکی کن حکومت نا کوشست آتے مون آ تخسا پندار سفیر ءِ پاکستان و جمہوریہ چیک انا نیام اٹ اقتصادی کمکاری ءِ مون آ دننگ کن گام گیج خاص کر دا رداٹ ٹیکنالوجی نا گدریفنگ کن کاریم کننگ نا پارت کرے۔ کشمیر نا ویل انا ذکر ءِ کرسا صدر مملکت پارے کہ پاکستان مقبوضہ کشمیر اٹی انسانی حق آتا خلاف ورزی تے گوجالنگ کپک، پاکستان ہمیشہ تینا کشمیری ایڑھ ایلم تتون سلوک مریک۔ صدر پاکستان و جمہوریہ چیک انا نیام اٹ موسیقار، فنکار، دودوربیدگی طائفہ، قومی دودوربیدگی میرات نا رکھ و مون آ دننگ کن اسیجائی ڈٹ و السی رابطہ غاتا کمک اٹ دودوربیدگی رابطہ غاتے سوگو کننگ نا گرج آ زور شاغا۔ صدر مملکت پندار سفیر آ زور شاغا کہ او پاکستانی سیل و سوات ءِ مون آ دننگ آ خصوصی چکار کے انتئے کہ پاکستان سیل و سوات نا بابت کچ انا تخوک ءُ ملک اسے۔ اوپندار سفیر کن نیک است خواہی و اونا دور سفارت اٹی ہڑتوم آ ملک آتا نیام اٹ تعلقداری تیٹی ودکی نا اومیت نا درشانی ءِ کرے۔
