اسلام آباد۔ 03ستمبر (اے پی پی) اسپیکر قومی اسمبلی اسد قیصر پارینے کہ بھارت نا کنڈآن کشمیر نا آئینی حیثیت ءِ چٹفنگ ڈیہہ ءِ جنگ اسے ٹی دِکہ تننگ نا سوب مننگ ءِ، او آئی سی کشمیر نا ویل انا ایسری کن کڑد ادا کے انتئے کہ کشمیری تیا ظلم و ستم نا بابت ساڑی آ بھارتی گام گیج آک دا دروشم ءِ مچ آ دنیاغا پیدوار کرینو۔ داخیال آتا درشانی ءِ او اومان نا مجلس شوری نا چیئرمین خالد بن ہلال ناصر المعولی نا کماشی ٹی سلطنت عمان نا مجلس شوری نا 10 باسکی پارلیمانی ڈل اتون اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری، کشمیر نا تازہ حالیت آتون اوار تین پہ تینی است خواہی نا اہم معاملہ غاتیا گپ و تران کننگا۔ اسپیکر قومی اسمبلی پارے کہ پاکستان اومان تون تینا برادرانہ و دوستانہ تعلقداری تے قدر انا نظر اٹ ہرک۔ پاکستان برادر ملک اومان تون علاقائی شونداری، زرکاری و ایلواہم بشخ آتے ٹی شریداری ءِ مون آدننگ خواہک۔ اوپارے کہ پاکستان ڈیہہ نا امن، شونداری و شونہالی کن غٹ ہمسایہ و سنگت ملک آتون خڑکی تعلقداری تے ودفنگ نا خواہندار ءِ۔ 5 اگست آبھارت نا کنڈآن کشمیر نا آئینی حیثیت ءِ چٹفنگ ڈیہہ ءِ جنگ اسے ٹی دِکہ تننگ نا سوب مننگ ءِ۔ اسد قیصر پارے کہ مقبوضہ جموں کشمیر اٹی 29 دے آن پدریسہ کرفیو نافذ کننگ کشمیری الس نا زند ءِ یند کننگانے۔ کشمیر نا ویل انا اقوام متحدہ نا سلامتی کونسل نا قراردادآتا رداٹ پرامن ایسری ڈیہہ ٹی پائیدار امن کن المی ءِ۔ آر ایس ایس نا فاشٹ نظریہ نا پیروکار بھارتی حکومت ہندوستان اٹی اقلیت آتے کن ڈغار ءِ تنک کرینے۔ بھارتی فوج انا کنڈآن مقبوضہ وادی ٹی پیلٹ گن آتا بے تک کاریم اٹ اتنگ آن ہزار آ بندغ آک کور مسنو۔ اوپارے کہ مقبوضہ وادی ٹی میڈیا غا پابندی خلسا بھارت دنیا آن کودک کشمیری الس نا حالت زار ءِ اودیم کننگ خواہک۔ کرفیو نافذ کننگ نا سوب آن مقبوضہ جموں کشمیر اٹی خور و دوائی تا کاختی ءِ۔ اسد قیصر پارے کہ جہانی برادری مقبوضہ جموں کشمیر اٹی انسانی حق انا خلاف ورزی تا نوٹس ہلک و مقبوضہ وادی ٹی کرفیو نافذ کننگ نا دمدستی چٹفنگ کن کڑد ادا کے۔ ہڑتوم آ ملک آتا نیام اٹ پارلیمانی کہول آ ڈل آتا ہن و بر آن اسہ ایلو نا آزموندہ غاتیان فائدہ ہرفنگ نا وارخواہی دوئی مریک۔ داوخت آ عمانی ڈل انا سروک خالد بن ہلال ناصر المعولی پارے کہ عمانی پارلیمنٹ پاکستان تون تینا برادرانہ و دوستانہ تعلقداری تے پین ودفنگ نا خواہندار ءِ۔ اومان پاکستان تون غٹ بشخ آتے ٹی کمکاری ءِ برجاتخک۔ اوپارے کہ پارلیمانی سفارتکاری ءِ متحرک کرسا نن چندی بشخ آتے ٹی اسہ ایلو نا آزموندہ غاتیان فائدہ ہرفنگ کینہ۔ اومان کشمیر نا ویل ءِ اقوام متحدہ نا سلامتی کونسل نا قرارداد آتا رداٹ پرامن ایسر کننگ نا متمنی ءِ۔ خالد بن ہلال ناصر المعولی پارے کہ کشمیر نا ویل برصغیر نا تقسیم نا بے پورو ایجنڈا ءِ دا ویل ءِ ایسر کننگ آن بیدس ڈیہہ ٹی امن ناممکن ءِ۔ کشمیر نا ویل انا پرامن ایسری ڈیہہ نا سلامتی نا بنداوی جزو ءِ۔ اومان کشمیر نا ویل ءِ اقوام متحدہ نا سلامتی کونسل نا قرارداد آتا رداٹ ایسری نا مخ تفی ءِ کیک۔ اوپارے کہ اومان اٹی رہینگوک پاکستانی پردیسی تا عمان شونداری ٹی خذمت آک ستاکڑزرہ۔ اومان نا مجلس شوری نا چیئرمین خالد بن ہلال ناصر المعولی قومی اسمبلی ٹی تخوک مہمان تا کتاب اٹی تینا تاثر آتے نوشتہ کرے۔ اوکان پد چیئرمین تینا ڈل اتون اوار قومی اسمبلی ہال انا دورہ ءِ ہم کرے۔
