حکومت ملک اٹی کاروبار اٹی آسانی ودی کننگ و تیل و گیس اٹی زرکاری ءِ ودفنگ کن گچین گام گیج کننگ ءِ،
اسلام آباد۔ 02 ستمبر (اے پی پی) بنجائی وزیر پٹرولیم و بجلی عمر ایوب خان پارینے کہ حکومت ملک اٹی کاروبار اٹی آسانی ودی کننگ و تیل و گیس اٹی زرکاری ءِ ودفنگ کن گچین گام گیج کننگ ءِ، قابل تجدید توانائی و پٹرولیم پالیسی نا پڑو ءِ زوت کننگک، بجلی نا پیدوار نا بشخ اٹی 40 ارب ڈالر و بشخنگ نا بشخ اٹی 20 ارب ڈالر نا زرکاری نا گنجائش ءِ، لین لاسز اٹی کمتی و سلوک آ پیسہ غاتا ہلنگ آ چکار کننگانے، زرکار آک پاکستان اٹی سرمایہ ءِ خلیر حکومت اوفتے غٹ آسراتی تے فراوان کیک۔ اوداخیال آتا درشانی ءِ دوشنبے نادے آ داڑے آئل اینڈ گیس کانفرنس آن تران و اوکان پدصحافی تتون گپ و تران کرسا کرے۔ عمر ایوب خان پارے کہ حکومت ملک اٹی ساف و شفاف پالیسی آ عمل کننگ ءِ۔ زرکاری نا ودنگ آن روزگار نا وارخواہی ٹی ہم ودکی مریک۔ سی پیک نا رداٹ ملک اٹی بھلو زرکاری اس مننگ ءِ داڑان ننا صنعتی، کشاری و ایلو بشخ آک ہم شون ہلیرہ۔ قابل تجدید پالیسی نا تیاری ٹی نجی بشخ اتون ہم سلابت کننگانے۔ دا پالیسی کابینہ کمیٹی توانائی، کابینہ و ولدا مشترکہ مفادات کونسل نا دیوان اٹی پیش کننگک۔ اوپارے کہ بجلی نا پیدوار نا بشخ اٹی ارب آ ڈالر نا زرکاری آن کبین انگا بجلی نا جاگہ غا اڑزان بجلی ودی مریک۔ داوخت انرجی مکس اٹی قابل تجدید توانائی نا بشخ 3 آن 4 درسد ءِ۔ 2005ء اسکان دادے 20 درسد و 2030 ء اسکان 30 درسد اسکان دینہ۔ داوخت قابل تجدید توانائی آن بجلی نا پیدوار 1600 میگاواٹ ءِ ہرا 2025ء اسکان 10 ہزار میگاواٹ و 2030 ء اسکان 18 ہزار میگاواٹ مریک۔ اوپارے کہ کراچی ٹی ساڑی آ پِر تیٹی مروک آ جانی نسخان نا بابت نیپرا جاست وپاست کننگ ءِ۔ کے الیکٹرک نا معاملہ غاتیا قائمہ کمیٹی ٹی ہم ہیت مسنے۔ دا بابت رپورٹ بریک۔ گیس انا ودکی بل آتے صارف آتے پدی کننگ نا بابت سوج انا ورندی ٹی اوپارے کہ دا معاملہ عدالت اٹی ءِ۔ صارف آتے پیسہ غاتے پدی تننگک۔ اوپارے کہ ننا جی ڈی پی نا کچ سعودی عرب نا جی ڈی پی آن زیات ءِ و پاکستان اٹی صنعتی سروسز و کشت و کشار نا بشخ انا جی ڈی پی ٹی بھلو بشخ اسے۔ توانائی نا طلب پدریسہ ودنگ ءِ۔ ملک اٹی پوسکن ءُ صنعت خلنگ نا گرج ءِ۔ توانائی نا حالیت آتے ٹی گچینی آن ننے صنعتی و ایلو بشخ آتا طلب ءِ پورو کننگ و صارف آتے اڑزان بجلی فراوان کننگ اٹ کمک رسینگک۔ اوپارے کہ تیل و گیس انا بشخ اٹی پٹ وپول و شونداری نا سرجزآتے مون آ دننگ نا گرج ءِ۔ وزیراعظم پارت کرینے کہ ملک اٹی ہندن ءُ سازگار چاگڑد اس ودی کننگے ہراڑے زرکاری ٹی ودکی مرے خیسن انگا فیتہ نا اڑاند آک چٹر و زرکارآتے ہروڑنا آسراتی دوبرے۔
