تیل و گیس انا بشخ اٹی زرکاری ءِ ودفنگ کن اصلاحات کننگ انگ ءِ، ایل پی جی نا نہاد و فراوانی ءِ گچین کننگک، عدالت آتیان کیس آتا چٹنگ آن پد ودکی گیس بل آتا مد اٹی صارف آتے 2 ارب 80 کروڑ روپئی پدی تننگک
اسلام آباد۔ 02 ستمبر (اے پی پی) وزیراعظم نا خصوصی کمکار پٹرولیم ندیم بابر پارینے کہ تیل و گیس انا بشخ اٹی زرکاری ءِ ودفنگ کن اصلاحات کننگ انگ ءِ، آئل ریفائنری تا پیدوار و تیل وگیس کوڑی کننگ نا گنجائش ءِ ودفنگ ناگرج ءِ، ایل پی جی نا نہاد و فراوانی ءِ گچین کننگک، توانائی نا بشخ اٹی مسابقت نا کمک اٹ ہدف آتے دوئی کننگک، صارف آتے 2 ارب 80 کروڑ روپئی نا ودکی گیس بل آتا مد اٹی عدالت آتیان کیس آتا چٹنگ آن پد پدی تننگک۔ اوداخیال آتا درشانی ءِ دوشنبے نادے آ داڑے آئل اینڈ گیس کانفرنس آن تران و اوکان پد صحافی تتون ہیت وگپ کرسا کرے۔ ندیم بابر پارے کہ تیل و گیس انا بشخ اٹی ننے مسابقت ءِ مون آ درسا مون آ ہنوئی ءِ۔ نہاد آتا حالیت آتے ہم گچین کننگ نا گرج ءِ۔ پالیسی ساز و ریگولیٹرز نا جتا جتاءُ زمواری ءُ۔ ایل پی جی نا نہاد آتا تیرمہ ٹی کمتی نا شکوہ مریک ولے سیل اٹی اوفتا نہاد آتے بھاز ودفنگک ہراڑان نیزگار و مر مر انگا علاقہ غاتے ٹی رہینگوک آ صارف آتے سگوئی تمک انتئے کہ ایل پی جی نیزگار الس نا ایندھن ءِ۔ اوپارے کہ داحالیت آتے برجاتخنگ مفک۔ ایل پی جی نا نہاد و سپلائی ءِ گچین کننگ نا اصلاحات نا گرج ءِ۔ ملک اٹی تیل و گیس کوڑی کننگ نا گنجائش ءِ ودفنگ نا گرج ءِ۔ اسہ سوج اسے نا ورندی ٹی اوپارے کہ صارف آتے مون تروک آ ودکی گیس بل آتا پیسہ غاک 2 ارب 80 کروڑ روپئی مریرہ۔ اوگرا و ایس این جی پی ایل دا چرجوئی ٹی کمیٹی جوڑ کریسر ولے دا معاملہ عدالت آتے ٹی زیر سماعت ءِ ہندن کہ کیس چٹک صارف آتے پیسہ غاک پدی ملرہ۔ اوپارے کہ نن بروک آ 10 آن 20 سال اکن توانائی نا کھپت و فراوانی نا جاچ ءِ ہلنگ اُن و دا چرجوئی ٹی پٹرولیم انسٹی ٹیوٹ نا رپورٹ معاملہ غاتے گچین کننگ اٹ کمکار مریک۔ حکومت ملک اٹی کاروبار اٹی آسانی ودی کننگ کن گام گیج کننگ ءِ۔ زرکار آتا زرکاری نا رکھ و آسراتی تا فراوانی کن ہروڑ آسراتی فراوان کننگ ءِ۔
