ساڑی حکومت وزیراعظم عمران خان نا ویژن نا رداٹ معیشت نا بحالی، کشاری و راجی بشخ انا شونداری، نیزگاری نا چٹفنگ، غذائی کمتی ءِ مر کننگ، زالبول آتے چنکو کاروبارا س بناکننگ اٹ کمکاری کن گچین حکمت عملی نا رداٹ کاریم کننگ ءِ، صاحبزادہ محبوب سلطان

اسلام آباد۔ 02 ستمبر (اے پی پی) بنجائی وزیر نیشنل فوڈ اینڈ سیکورٹی ریسرچ صاحبزادہ محبوب سلطان پارینے کہ ساڑی حکومت وزیراعظم عمران خان نا ویژن نا رداٹ معیشت نا بحالی، کشاری و راجی بشخ انا شونداری، نیزگاری نا چٹفنگ، غذائی کمتی ءِ مر کننگ، زالبول آتے چنکو کاروبار اس بناکننگ اٹ کمکاری کن گچین حکمت عملی نا رداٹ کاریم کننگ ءِ، وزیراعظم کشاری ایمرجنسی پروگرام نا رداٹ پولٹری نا بشخ ءِ شون ترسا نئے بیرہ خلقی علاقہ غاتے ٹی نیزگاری ٹی کمتی بریک بلکن شاری تیٹی غذائیت نا کمتی و گچین خور انا فراوانی ٹی کمک رسینگک، اُرائی مرغبانی پروگرام اونا اسہ کڑی اسے، داڈٹ انا رداٹ 50 لکھ ککڑ مچ آ ملک اٹ تننگک ہرافتیا اسہ ارب 64کروڑ اسکان خڑچ بریک، ننا جم اٹنگا قومی پیدوار اٹی 11 درسد لائیو اسٹاک ان بشخ ءِ، بنجائی و پنجاب حکومت اواری اٹ دا ڈٹ آ کاریم کیرہ۔ داخیال آتا درشانی ءِ او پولٹری ریسرچ انسٹیٹیوٹ راولپنڈی ٹی دیہی مرغبانی نا بناءِ کننگ نا وخت آ تران کرسا کرے۔ صوبائی وزیر لائیو اسٹاک وڈیری ڈویلپمنٹ پنجاب حسنین دریشک، بنجائی سیکرٹری ڈاکٹر ہاشم پوپلزئی، جہانگیر ترین تون اوار سیکرٹری لائیو اسٹاک پنجاب نبیل اعوان و ایلوفک ساڑی ئسر۔ بنجائی وزیر محبوب سلطان پارے کہ ننا جم اٹنگا قومی پیدوار نا 18 درسد کشت وکشار ءِ ہراٹی لائیو اسٹاک نا بشخ 11 درسد ءِ۔ ساڑی حکومت لائیو اسٹاک نا بشخ انا شونداری کن پرعزم ءِ۔ دا بشخ اٹی گچینی اتسا نئے بیرہ نیزگاری ٹی کمتی اتنگ مریک بلکن غذائی کمتی ءِ ہم پورو کننگ مریک۔ اوپارے کہ دا پروگرام نا رداٹ خلقی آ علاقہ غاتے ٹی ککڑآتا یونٹس فراوان کننگک، دا بابت پنجاب حکومت اسہ سٹڈی و پریکٹیکل بنداو تیا کاریم کرینے۔ داوخت آ سیکرٹری نیشنل فوڈ سیکورٹی ڈاکٹر ہاشم پوپلزئی پارے کہ ڈٹ انا مسخت خلقی آبادی ءِ نیزگاری نا لکیر آن کشوئی ءِ۔ دا پروگرام ءِ حکومت پاکستان تینا فنڈ آن پورو کیک۔ وزیراعظم نا منت وار اُن ہرا غذائی کمتی ءِ مر کننگ نا پروگرام ءِ اولیت تس۔ ملک اٹی غذائی کمتی ءِ پورو کننگ کن دا ڈٹ آن پین جوان ءُ ڈٹ اف۔