اسلام آباد۔ 02 ستمبر (اے پی پی) آزاد جموں و کشمیر نا صدر سردار مسعود خان پارینے کہ جہانی برادری ءِ داسہ دا پک کروئی مریک کہ او ظالم تون سلوک ءِ یا مظلوم تون ءِ، بھارت غٹ جہانی کانود و اخلاقی قدر ءِ لتاڑسا کشمیر اٹی نسل کشی نا پالیسی آ روان ءِ و سکارچڈارتھ پالیسی نا رداٹ نئے بیرہ کشمیری تے تہہ و تیغ کننگ ءِ بلکن اوفتا میرات، رہینگوک آ ہند، کاروبار و خور انا کوڑی تے ہم تباہ و برباد کننگ ءِ تانکہ کشمیری تے فاقہ کشی آن دوچار کرسا تینا غلامیءِ قبول کننگ آ بیوس کننگ کے۔ داخیال آتا درشانی ءِ او اسلام آباد اٹی سنٹر فار پیس، سیکورٹی اینڈ ڈویلپمنٹ نا کنڈآن کشمیرتنکی آ قومی کانفرنس آن تران کرسا کرے۔ دود آن سینیٹر شیری رحمان و لیفٹیننٹ جنرل (ر) آغا عمر فاروق ئسک ہم تران کریر۔ داوخت آ مسکوہی چیف آف ایئر اسٹاف سہیل امان، لیفٹیننٹ جنرل (ر) آصف یاسمین ملک، مسکوہی سفیر عارف کمال، مسکوہی سفیر عبدالباسط و کشمیر انسٹیٹیوٹ آف انٹرنیشنل ریلیشنز نا چیئرمین حسین وانی ئسک ہم ساڑی ئسر۔ صدرآزاد کشمیر تینا تران اٹی پارے کہ مقبوضہ جموں و کشمیر اٹی بھارت نا کوزہ گر فوج پرامن شاری تیا انسانیت سوز ظلم کننگ ءِ وخت اس کہ مقبوضہ ریاست نا متنازعہ حیثیت ءِ چٹفسا اودے بھارتی یونین نا بشخ جوڑ کننگ نا گام گیج آن پد مقبوضہ کشمیر اٹی بدترین کرفیو و میڈیا سنسر شپ نافذ ءِ ہرانا سوب ہموڑے ظلم و نسل کشی نا اصل حالیت آتا کساس ءِ خلنگ مشکل ءِ ولے ہراحوال آک بننگ ءُ اوبھاز بے وڑ ءُ ولے اوکان پد ہم مقبوضہ کشمیرنا ہر شار و خلق اٹی چک و تاڑ جاری ءِ ہرا دا ہیت انا شاہدی ءِ کہ کشمیری بھارت نا غلامی ءِ ہچ ءُ حالیت اسے اٹی امنا کننگ کن تیار افس۔ اوپارے کہ جہانی برادری بھارت وپاکستان نا نیام اٹ مصنوعی توازین ءِ برجاتخنگ نا پالیسی ءِ ترک کے، حق و انصاف نا بنداو و عالمگیرانسانی قدر و جہانی کانود ءِ مون آ تخسا کشمیر نا ویل ءِ ہُننگ و اونا ایسری اس پٹنگ کن کوشست کے۔
