لندن۔ 02 ستمبر (اے پی پی) مقبوضہ کشمیر اٹی مسہ ہفتہ غان زیات وخت آن قیدو بند نا چاگڑد ءِ، بے چیٹیک ترند ومواصلاتی نظام یند ءِ ولے بھارت نا حکومتی دعواک اونا برعکس ءُ۔ برطانوی نشریاتی ادارہ دوشنبے نادے آ تینا اسہ رپورٹ اسے ٹی پارے کہ بھارتی حکومت نا رداٹ کشمیر اٹی حالیت آک خوشگوار ءُ و ہچ ءُ ناخوشگوار واقعہ سے نا حوال اف ولے داڑتون اوار اوداہم امنا کیک کہ جاگہ جاگہ غا بیدادی و تصادم نا واقعہ غاک پیش بریرہ ولے اوفتے ٹی ٹھپی تا کچ انا جاگہ اس ہم ذکر مفک۔ بی بی سی نا نامہ نگار مقبوضہ کشمیر اٹی بیدادی نا گواچی بندغ آتون اوڑدہی کرے تو معلوم مس کہ دُن انگا بندغ آتے ٹی پنچ سال انا چناآن ہلیس 72 سال اسکان نا بزرگ آ بندغ آک اوارو۔ رپورٹ نا رداٹ دافتیان گڑاس خلقت پیلٹ گن آتیان پیش تموک آ چرہ غاتیان ٹھپی مسنو و گڑاسے ہمو خلک لگانو ہرافتے بھارتی فوجیک ربڑاٹ غلیل جوڑ کرسا خلکوسر۔ داوڑنا ٹھپی تیٹی پنچ سال انا مسڑ منیفہ نذیر ہم اوارے ہرامتکن آ سرینگر نا علاقہ نا رہینگوک اوسے و بھلا عئید انا دے تینا اِلہ تون قربانی نا سُوتے بشخنگ کن ہناسس ہراتم اوفتے تون دا واقعہ پیش بس۔ منیفہ نذیر نا اِلہ فاروق پارے کہ ای عئید انا اولیکو دے قربانی کریٹ و غٹ خلقت اٹی اوفتے بشخاٹ، نن شام انا کم و ود شش ءُ نیم بجہ غا اُراغا بسن، ہمووخت آ ہموکان فورس آتا تعیناتی ءِ کننگاکہ، اوپارے کہ ہمووخت آ پد آن اِرافوجی گاڈی بسرہ، اوفک ہندن ءُ غلیل اسے ٹی خل اس خلکر ہرا سیدھا چنانا خن اٹی لگا۔ ہمووخت آ نئے تو خل خو ئس و نئے تو مچی مسکہ، اوفک ہندن خل خلکر۔ اوکان پد بھارتی سی آر پی ایف و جموں کشمیر پولیس کنتون رابطہ کرے و دا امنا کریر کہ اوفتیان داغلطی مسنے۔ اوپارے کہ ڈاکٹر آتا پاننگ ءِ کہ چنانا خن انا دیدہ ءِ نسخان رسینگانے و چونکہ داسہ او کم وئی و نزور ءِ، ہنداخاطران اونا دمدستی وڑاٹ آپریشن ءِ کننگ مفک۔
