xاسلام آباد۔ 29 اگست (اے پی پی) وزیراعظم عمران خان تون پاکستان تحریک انصاف نا مرکزی سیکرٹری مالیات سردار اظہر طارق نا کماشی ٹی مسہ باسکی ڈل اوڑدہی کرینے، اوڑدہی ٹی وزیراعظم عمران خان ءِ ڈل پاکستان تحریک انصاف نا مالیات آ سرجم بریفنگ تس و الیکشن کمیشن آف پاکستان اٹی جمع کرفوک آ سالانہ گوشوارہ غاتا منظوری ءِ ہلک۔ پاکستان تحریک انصاف نا مرکزی میڈیا ڈیپارٹمنٹ آن جاری کروک آ بیان نا رداٹ وزیراعظم عمران خان تون اوڑدہی کروک آتے ٹی پاکستان تحریک انصاف نا مرکزی سیکرٹری مالیات سردار اظہر طارق، پاکستان تحریک انصاف نا فنانشل ایڈوائزر سراج احمد و جنرل منیجر محمد ارشد ئسک اوار ئسر۔ وزیراعظم عمران خان آن منظوری آن پد تحریک انصاف نا مالیاتی ٹیم سالانہ گوشوارہ الیکشن کمیشن اٹی جمع کرفک۔ گچین کاری کانود نا رواٹ ہر سیاسی جماعت تینا کٹیاو خڑچ آتا سرجم آتے سالانہ بنداو تیا الیکشن کمیشن اٹ جمع کرفنگ نا پابند ءِ۔ پاکستان تحریک انصاف اسٹ انگا جماعت ءِ ہرا باقاعدگی اٹ بے کچ مفصل سرجم آتے الیکشن کمیشن اٹی جمع کرفک۔
