اسلام آباد۔ 29 اگست (اے پی پی) وزیراعظم عمران خان پارینے کہ غٹ پاکستانیک کشمیری الس تون پبی یکجہتی نا درشانی کن جمعہ نادے نیم گھنٹہ کن غٹ کاریم تے ہلر و پیشن پیش تمر۔ پنچ شنبے نادے آ تینا اسہ ٹویٹ اسے ٹی وزیراعظم پارے کہ نیمروچ آ 12بجہ غان 12:30 اسکان پیشن پیش تمر و مقبوضہ وادی ٹی کشمیری ایلم تے پیدوار کلہو ایتر کہ پاکستانی قوم بھارت نا جبر، فسطائیت، 24دے ئی انسانیت کش کرفیو، زالبول و چناتے تون اوار کشمیری شاری تا ہردے نا بنداو آ شہید و ٹھپی کننگ نا واقعہ، مودی حکومت نا نسل کشی نا ایجنڈا و ڈیہہ نا حیثیت ءِ بدل کننگ نا غیر کانودی گام گیج نا برخلاف کشمیری ایلم تتون اوار سلوک ءُ۔ اوپارے کہ مقبوضہ کشمیر اٹی آبادی نا تناسب ءِ بدلیفنگ نا بھارتی ڈٹ چارمیکو جنیوا کنونشن نا رداٹ جنگی ڈوہ اسے۔ وزیراعظم پارے کہ ننے کشمیری تے پبی کلہو تروئی ءِ کہ ننا قوم پورو وڑاٹ اوفتے تون سلوک ءِ، ہنداخاطران ای غٹ پاکستانی تے پاوہ کہ جمعہ نا دے نیم گھنٹہ کن غٹ کاریم تے ہلر و پیشن پیش تمر و کشمیری الس تون پبی یکجہتی نا درشانی ءِ کیر۔
