اسلام آباد۔ 29 اگست (اے پی پی) حکومت پٹرولیم نا بشخ اٹی زرکاری ءِ ودفنگ و کاروبار اٹی آسانی ودی کننگ کن جامع روڈ میپ اسے نا پڑو ءِ کرینے ہرانا رداٹ تیل و گیس انا پٹنگ، ریفائنری، تیل و گیس کوڑی کننگ، پیپ لین تا جوڑ کننگ، ایل پی جی و ایل این جی نا بشخ آتے ٹی پالیسی اصلاحات و کاروبار اٹی آسانی ودی کننگ کن گچین گام گیج کننگک، تیل و گیس انا پٹنگ اٹ زرکاری کن چندی ادارہ غاتیان منظوری ہلنگ نا عمل ءِ 24محکمہ غاتیان کم کرسا 14محکمہ غاتسکان کننگانے، ہر بشخ اٹی اجارہ داری ءِ چٹفنگک، پوسکن آ پٹرول پمپ آتا جوڑ کننگ کن منظوری 17 نا جاگہ غا 6 آن 7 جاگہ غان ہلنگک، پوسکن آ ایل پی جی پالیسی نا بروک آ تُو پڑو ءِ کننگک، نہاد آتا تعین نا ہم وڑوڈول جوڑ مریک، پنچ درملکی کمپنی ایل این جی ٹرمینل نا جوڑ کننگ کن زرکاری کیرہ، ایل این جی نا صنعتی صارف آتے 30 دے انا تہہ ٹی گیس کنکشن ملک۔ روڈ میپ انا پڑو ءِ وزیراعظم نا خصوصی کمکار پٹرولیم ندیم بابر وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان و بنجائی وزیر بجلی و پٹرولیم عمر ایوب تون اوار پریس کانفرنس آن تران کرسا کرے۔ ندیم بابر پارے کہ ہراوخت اسکان ملک اٹی کاروبار ودپک ملازمت آک ودنگ کپسہ وزیراعظم نا پارت نا رداٹ اصلاحات و زرکار و لس خلقت کن آسانی ودی کننگ اُن، وزیراعظم و کابینہ نا گڑاس باسک آتے پالیسی اصلاحات و کاروبار اٹی آسانی ودی کننگ نا بارواٹ معلومدار کرینے۔ اوپارے کہ پالیسی اصلاحات کاروبار اٹی آسانی ودی کننگ کن کننگ انگ ءِ، بھاز انگا کانود آک ہندن ءُ ہرافتا ہچ ءُ مصرف اس اف، تدوک آ 15، 20 سال اٹی مشکل اس پیش بریک تو پوسکن ءُ کانود اس جوڑ کننگک و اونا کمک اٹ ویل آتے ایسر کننگ نا کوشست کننگک۔ خصوصی کمکار ندیم بابر پارے کہ کیہی بشخ آتے ٹی سہی وڑاٹ مقابلہ نا فضا ساڑی اف یا تو اجارہ داری ءِ یا گڑاس کمپنی ایلوفتے داٹی پترینگ انگ کن الیپسہ داسہ ہر بشخ اٹی اجارہ داری ءِ چٹفنگک تانکہ زرکاری برے و غیر فعال کمپنی تے فعال کننگے، مقابلہ نا فضاء ودی کرسا زرکاری ٹی ودکی کننگ مریک۔ ندیم بابر پارے کہ پٹرولیم نا بشخ اٹی تیل و گیس انا پٹنگ کن زرکاری کن کم از کم 24و عمومی وڑاٹ 30 انا خڑک منظوری درکار ءِ، تدوک آ ہشت آن 10سال اٹی نظام اٹی ویل ویچڑ نا سوب آن پیشن نا کمپنیک پاکستان آن ہنانو۔
