اسلام آباد۔ 29 اگست (اے پی پی) وزیر خارجہ مخدوم شاہ محمود قریشی پارینے کہ مقبوضہ جموں و کشمیر اٹی بھارتی استبداد ءِ توننگ و ڈیہہ نا امن و ایمنی ءِ برجا تخنگ کن جہانی برادری ءِ تینا کڑد ءِ ادا کروئی مریک۔ بھارت اسہ کنڈی،غیر کانودی گام گیج آتیان مقبوضہ جموں و کشمیر نا خصوصی حیثیت ءِ چٹفینے و وادی ٹی جبر اََ آبادیاتی تناسب ءِ بدل کننگ خواہک۔ پنچ شنبے نادے آ تینا سری لنکن ہم منصب تلک ماراپانا تون ٹیل فون آ گپ و تران کرسا شاہ محمود قریشی پارے کہ مقبوضہ جموں و کشمیر اٹی بھارتی اسہ کنڈی گام گیج جہانی کانود و اقوام متحدہ سیکورٹی کونسل نا قرارداد ااتا خلاف ورزی ءِ، ہڑتوم آ وزیر خارجہ غاک مقبوضہ جموں و کشمیر اٹی جاری انسانی حق انا سنگین خلاف ورزی و ڈیہہ ٹی امن و ایمنی نا مخدوش حالیت آتیا گپ و تران کریر۔ وزیر خارجہ شاہ محمود قریشی پارے کہ پنچ اگست آن مقبوضہ جموں و کشمیر نا کودک مسلمان تے پدریسہ کرفیو نا مون تروک ءِ وخت اس کہ جہانی میڈیا و انسانی حق انا جہانی تنظیمک مقبوضہ جموں و کشمیر اٹی بھارت نا کنڈآن سنگین خلاف ورزی تا پڑدہ ءِ پاش کرینو۔ بھارت نا دا جبری چم بازی تیان مچ آ ڈیہہ نا امن شیف و بڑز مننگ کیک۔ ”جنیوا سائیڈ واچ“ کون آ جہانی تنظیمک، مقبوضہ جموں و کشمیر اٹی کودک خلقت نا کشت و خون نا خطرہ ءِ ظاہر کرینو۔ سری لنکا نا وزیر خارجہ تلک ماراپانا پارے کہ نن پاکستان تون ہڑتوم آ کنڈآتا تعلقداری تے خاص اہمیت ایتنہ و وزیر خارجہ نا زوت دورہ سری لنکا نا چاری اُن۔
