بھارت جبری جم بازی تے اٹ مقبوضہ جموں و کشمیر اٹی آبادیاتی تناسب ءِ بدل کننگ خواہک
اسلام آباد۔ 29 اگست (اے پی پی) وزیر خارجہ مخدوم شاہ محمود قریشی پارینے کہ بھارت جبری چم بازی تے اٹ مقبوضہ جموں و کشمیر اٹی آبادیاتی تناسب ءِ بدل کننگ خواہک، مقبوضہ جموں و کشمیر نا کودک خلقت ءِ پدریسہ کرفیو تون مون تروئی تمنگ ءِ ہرانا سوب خور و دوائی تا بھاز کاختی ودی مسنے۔ داخیال آتا درشانی ءِ او پنچ شنبے نادے آ نیوزی لینڈ انا نائب وزیراعظم ونسٹن پیٹر تون ٹیل فون آ گپ و تران اٹی کرے۔ ہڑتوم آ راہشونک مقبوضہ جموں و کشمیر اٹی جاری انسانی حق انا سنگین خلاف ورزی و ڈیہہ ٹی امن و ایمنی نا ابتر حالیت آتیا گپ و تران کریر۔ وزیر خارجہ پارے کہ بھارت اقوام متحدہ سیکورٹی کونسل نا چندی قرارداد آتا خلاف ورزی ءِ کرسا 5 اگست آ اسہ کنڈی گام گیج آتا کمک اٹ مقبوضہ جموں و کشمیر نا خصوصی حیثیت ءِ چٹفے۔ اوپارے کہ بھارت جبری چم بازی تیان مقبوضہ جموں و کشمیر اٹی آبادیاتی تناسب ءِ بدل کننگ خواہک، مقبوضہ جموں و کشمیر نا کودک خلقت ءِ پدریسہ کرفیو تون مون تروک تمنگ ءِ ہرانا سوب خور و دوائی تا بھاز کاختی ودی مسنے۔ وزیر خارجہ پارے کہ ذرائع مواصلات آ پورو پابندی خلنگانے تانکہ اصل راستکی تے دنیا نا مون آ اودیم تخنگے۔ مخدوم شاہ محمود قریشی پارے کہ جہانی میڈیا و انسانی حق انا جہانی تنظیم تا کنڈآن مون آ بروک آ چشم کشارپورٹ آک اسہ پوسکن ءُ انسانی المیہ سے نا پیدواری ءِ کرسا خننگرہ۔ نیوزی لینڈ نا نائب وزیراعظم و وزیر خارجہ مقبوضہ کشمیر نا حالیت آتیا گڑتی نا درشانی ءِ کرسا پارے کہ نن مچ آ حالیت آتا جاچ ءِ ہلنگ اُن۔ نیوزی لینڈ اٹی ساڑی کشمیری کمیونٹی نا کنڈآن ہم ننے حالیت آتیان آگاہی دوئی مننگ ءِ و نن دا چرجوئی ٹی تینا مثبت کڑد ءِ ادا کرسا کینہ۔
