اسلام آباد۔ 29 اگست (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ پاکستان بدلی نا دور آن گدرینگ انگ ءِ و وڈی خوری نا چٹفنگ، شفافیت ءِ المی کننگ و گچین حکمرانی ساڑی حکومت نا اولیت آتے ٹی اوار ءِ، اقتصادی چیلنج آتیان پد ہم حکومت نا کنڈآن معیشت نا گچینی کن گام گیج آتا مثبت بھرم مون آ بننگ ءِ، وزیراعظم عمران خان تینٹ گچین حکمرانی و شفافیت آ یخین تخک و دا بابت پرعزم ءِ، کیپٹل مارکیٹ ریگولیشنز نا رداٹ تین پہ تینی و علاقائی رابطہ غاتا گچین بھرم مون آ بریک۔ وزیراعظم نا سلاہکار خزانہ و محصولات ڈاکٹر عبدالحفیظ شیخ داہیت ءِ پنچ شنبے نادے آ داڑے اولیکو نیامی ایشیائی علاقائی کمکار(کاریک) کیپٹل مارکیٹ ریگولیشن فورم آن تران کرسا پارے۔ فورم نا بست و بند ءِ کاریک سیکورٹیز اینڈ ایکسچینج کمیشن آف پاکستان نا کمک اٹ کرینے۔ وزیراعظم نا سلاہکار پارے کہ نیامی ایشیاو دیکی ایشیا نا ڈیہہ نا نیام اٹ تعلقداری و کمکاری اہمیت تخک انتئے کہ نن چانہ کہ شونداری یکجا مننگ کیک۔ اوپارے کہ علاقائی رابطہ، و حکومت آتا نیام اٹ کمکاری تون اوار اوار کیپٹل مارکیٹ آتا نیام اٹ ضابطہ غاتا بابت تین پہ تینی رابطہ نا اہمیت آن نمن مننگ کپک۔ داہیت ءِ ہم پہہ مننگ نا گرج ءِ کہ گچین و شفاف وڑاٹ آپریشن تا کمک اٹ نجی بشخ اکن آسانی و آسراتی فراوان کننگے انتئے کہ جان جوڑی، تعلیم، ٹرانسپورٹ و ایلو بنداوی گرج آتا فراوانی ٹی حکومت تون اوار اوار نجی بشخ ہم تینا کڑد ءِ ادا کننگ کیک۔ ڈاکٹر عبدالحفیظ شیخ پارے کہ معیشت خاص کر کیپیٹل مارکیٹ آتا بابت حکومت بیرہ پالیسی و کانود جوڑ کننگ کیک۔ کاروبار ءِ مون آ دننگ اٹ نجی بشخ انا کڑد آن نمن مننگ کپک۔ فورم آن تران کرسا سیکورٹیز اینڈ ایکسچینج کمیشن آف پاکستان نا چیئرمین عامر علی خان پارے کہ تینا وڑنا دا منفرد فورم نا اڈتننگ اٹ 11ملک آتیان تعلق تخوک آ مندوبین آتا بشخ ہلنگ بے کچ ستاکڑزک اولیکو وار سیم تا داپار ایپار کیپٹل مارکیٹ آتا نیام اٹ کمکاری ءِ مون آ دننگ دوئی مننگ ءِ و نن اسہ ایلو نا آزموندہ غاتیان ہیل کننگ اُن۔ اوپارے کہ علاقائی کیپٹل مارکیٹ آتا شونداری کن ننے اسیجاکوشست آتا گرج ءِ پاکستان اٹی کیپٹل مارکیٹ نا حالیت آتا ذکر ءِ کرسا پارے کہ او پارے کہ پاکستان اسہ اہم ءُ دور اسے آن گدرینگ انگ ءِ ریگولیٹر نا حیثیت اٹ سیکورٹیز اینڈ ایکسچینج کمیشن آف پاکستان کاروباراٹی آسانی کن ضابطہ جاتی آسراتی فراوان کننگ اٹ تینا کڑد ءِ جوان وڑاٹ ادا کننگ ءِ۔ پاکستان ڈیہہ نا اسہ اہم ءُ ملک اسے پاکستان نا کیپٹل مارکیٹ آتے ٹی درملکی زرکاری کننگ کیرہ۔ اوپارے کہ کیپیٹل مارکیٹ آپریشن تا بابت ایس ای سی پی ٹیکنالوجی و آٹومیشن ءِ مون آ دننگ کن کیہی گام گیج کرینے۔ اوپارے کہ نن کیپیٹل مارکیٹ ءِ حقی معیشت تون گنڈنگ خوانہ داڑتون اوار اوار کاروبار اٹی آسراتی تا فراوانی ہم ننا اولیت ءِ۔ داکان مست ایشیائی شونداری بینک انا نائب صدر شیکسن شن بیابخیری خطبہ ترسا فورم نا اڈتننگ ءِ بے کچ ستاکڑزوک گوندا اوپارے کہ علاقائی کیپیٹل مارکیٹ نا مون آ دننگ اٹ ایشیائی شونداری بینک تینا کلیدی کڑد ءِ ادا کننگ ءِ۔ ایشیائی شونداری بینک آسیان نا باسک ملک آتا کیپٹل مارکیٹ آتا سوگوی ٹی پبی کمک فراوان کرینے و کننگ ءِ نن دا کمکاری ءِ علاقائی کہول آ مون آ دننگ خوانہ۔ اوپارے کہ گرج دا ہیت انا ءِ کہ علاقائی کیپیٹل مارکیٹ آتا نیام اٹ ریگولیشن نا بابت کمکاری ءِ مون آ دننگے و داوڑنا فورم دارداٹ کمکار مننگ کیرہ۔
