پاکستان نا کشمیری تتون روح و جون نا رشتہ ءِ، اینو کشمیر ٹھپی و دتری ءِ، جمعہ نادے آ غٹ پاکستانیک وزیراعظم تون توار ءِ اسٹ کرسا یوم یکجہتی کشمیر اڈتروئی ءِ
اسلام آباد۔ 28 اگست(اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ پاکستان نا کشمیری تتون روح و جون نا رشتہ ءِ، اینو کشمیر ٹھپی و دتری ءِ، جمعہ نا دے آ غٹ پاکستانیک وزیراعظم تون توار ءِ اسٹ کرسا یوم یکجہتی کشمیر اڈ تروئی ءِ، جمعہ نادے غٹ الس و سول سوسائٹی دے انا 12بجہ غا یکجہتی نا درشانی ءِ کیر، مسیحی برادری کشمیری تا حق اکن مچ آ دنیا ٹی توار بڑز کیر۔ اوداہیت ءِ چارشنبے نادے آ داڑے شجر کاری مہم نا بابت دود آن تران کرسا پارے۔ اوپارے کہ یوم یکجہتی نا وخت آ مچ آ قوم یکجا مرسا مچ آ دنیا ءِ کشمیری تتون یکجہتی نا کلہو ءِ سرکیر، پاکستانی چناک جمعہ نا دے آ کشمیری چناتتون یکجہتی نا درشانی ءِ کیر، ہر وئی و بشخ انا بندغ آک جمعہ نادے آ کشمیری تتون یکجہتی نا درشانی ءِ کیر۔ ڈاکٹر فردوس عاشق اعوان پارے کہ کشمیری تا حق اٹی و مودی نا برخلاف غٹ اقلیت آک یکجاءُ، مقبوضہ کشمیر اٹی کشمیری تے کرفیو و پابندی تیان محصور کننگانے، اوفتے بنداوی آسراتی تیان محروم کننگانے، نریندر مودی ڈیہہ ٹی امن نا چاگڑد ءِ خطرہ ٹی بٹینے، وزیراعظم عمران خان نا کماشی ٹی نن دنیا ءِ کشمیر نا حالیت آتیان معلومدار کننگ اُن۔ ڈاکٹر فردوس عاشق اعوان پارے کہ ورناک آخبت نا سرمایہ ءُ، کنا مون آ طالب علم انا دروشم اٹ آخبت نا سرکڑدہ، ڈاکٹر و انجینئر سلوک ءُ۔ اوخاص کر اقلیت آتا حق آ زور شاغسا پارے کہ پاکستان اٹی غٹ اقلیت آتے رکھ و اسہ وڑ حق قائد اعظم نا وژن ئس، وزیراعظم عمران خان قائد اعظم نا سپاہی ءِ و قائد نا ویژن ءِ مون آ دننگ ءِ، قیام پاکستان آن تعمیر پاکستان اسکان مسیحی برادری تا اہم ءُ کڑد اسے، پاکستان نا غٹ اقلیت آک ننا گمرءُ۔ خصوصی کمکار پارے کہ درخت ڈغار نا زیبائی ءِ و چاگڑد ءِ کچٹی آن بچفرہ، ملک ءِ چاگڑدی کچٹی آن بچفنگ کن حکومت گرین پاکستان مہم نا بناءِ کرینے۔ غٹ بایدے زیات آن زیات بشخ ہلسا تینا بشخ ءِ شاغر۔
