اسلام آباد۔ 28 اگست (اے پی پی) قومی اسمبلی سیکرٹریٹ پارلیمنٹ نا اسیجائی دیوان آن صدر مملکت ڈاکٹر عارف علوی نا تران نا بابت غٹ بست و بند آتے پورو کرینے، دا چرجوئی ٹی غٹ مہمان تے سلہ نامہ مون تننگانے۔ قومی اسمبلی سیکرٹریٹ ناترجمان نا رداٹ پارلیمنٹ نا ہڑتوم آ ایوان تیان صدر مملکت نا تران جمعہ نا دے آ بیگہ نا 5 بجہ غا مریک ہراڑان ساڑی قومی اسمبلی نا ارٹ میکو پارلیمانی سال انا باقاعدہ بنامریک، قومی اسمبلی سیکرٹریٹ آئینی ادارہ غاتا سروک،ہرمسٹ آ سلہہ بند فوج آتا سروک، سفارت کار آتون اوار اہم شخصیت آتے سلہ نامہ مون تسنے۔ سیکورٹی بست وبند آتا بابت غٹ پارلیمان نا باسک و بنجائی وزیر آتے پارت کننگانے کہ او تین تون مہمان اتپس و نئے پارلیمنٹ نا باسک یا بنجائی وزیر اسے نا گارڈ آتے پارلیمنٹ نا دنگ اٹ پترینگ انگ نا موکل مریک، غٹ پارلیمنٹ نا باسک آتون اوار مہمان تا گاڈی تا سخت چیکنگ ءِ کننگک، پارلیمنٹ اٹی غٹ شرفدار آ مہمان، پارلیمنٹ نا باسک و ڈیوٹی آ ساڑی عملہ کن پارکنگ مختص کننگانے۔ یات سلے کہ آئین نا آرٹیکل 54نا رداٹ ہر پارلیمانی سال صدر مملکت اسیجائی دیوان آن تران مریک، صدر مملکت سینیٹ و قومی اسمبلی ءِ مچ آ پارلیمانی سال اکن تینا تران نا کمک اٹ راہشونی فراوان کیک۔
