اسلام آباد۔ 28 اگست (اے پی پی) وزیراعظم نا خصوصی کمکار جان جوڑی ڈاکٹر ظفر مرزا نا کماشی ٹی پولی کلینک نا اصلاحاتی کمیٹی نا ہفت می دیوان چارشنبے نادے آ اڈ ہلک۔ دیوان اٹی بنجائی سیکرٹری ہیلتھ ڈاکٹر اللہ بخش ملک، پارلیمانی سیکرٹری نیشنل ہیلتھ سروسز ڈاکٹر نوشین حامد، ایگزیکٹو ڈائریکٹر پولی کلینک و کمیٹی نا ایلو باسک آک بشخ ہلکر۔ ڈاکٹر ظفر مرزا پارے دیوان نا مسخت پولی کلینک ہسپتال اٹی اصلاحات نا کمک اٹ ہسپتال نا کارکڑد ءِ گچین کننگ نا ءِ تانکہ وزیراعظم نا ویژن نا رداٹ یونیورسل ہیلتھ کوریج نا رسینگ ءِ الس اسکان المی کننگے، دا چرجوئی ٹی جان جوڑی نا بشخ اٹی اصلاحات نا چرجوئی ترندی اٹ برجاءِ۔ اسلام آباد شار ءِ ماڈل ہیلتھ سٹی اس جوڑ کننگ کن عملی گام گیج آتا بناءِ کرینے تانکہ جان جوڑی نا بشخ اٹی مروک آ بدلی تا بھرم آک الس اسکان سرمریر۔ ڈاکٹر ظفر مرزا پارے کہ پولی کلینک اٹی اسٹ آن پانزدہ گریڈ اسکان نا ملازم آتا خورک آسامی تیان پوسکن بھرتی کننگک۔ ہسپتال اٹی اسٹاف نا کمتی ءِ پورو کننگک ہراڑان جان جوڑی نا بشخ اٹ گچینی بریک۔
