نیویارک۔ 28 اگست(اے پی پی) وزیراعظم عمران خان بروک آ تُو اٹی اقوام متحدہ نا جنرل اسمبلی نا دیوان اٹی مقبوضہ کشمیر نا سنگین حالیت آتے تالان کیک ہراڑے بھارتی کریک ڈاؤن اٹی انسانی تنکی ودی مسنے۔ داہیت ءِ امریکہ ٹی پاکستان نا سفیر اسد مجید وال سٹریٹ جرنل ءِ انٹرویو ٹی پارے۔ اوپارے کہ داہیت انا بھاز زیات گمان ءِ کہ وزیراعظم عمران خان جنرل اسمبلی نا دیوان اٹی بشخ ہلنگ کن امریکہ غابریک و بڑزکو کہول انا جنرل ڈیبیٹ اٹی بشخ ہلیک ہراڑے اودے مقبوضہ کشمیر نا بارواٹی بھارتی گام گیج و اوٹی ہموڑے ودی مروک آ حالیت آتا سنگینی ءِ پبی وڑاٹ تالان کننگ نا موقع ملک، جہانی برادری دا حالیت آتے بے حد سنجیدگی اٹ بایدے ہلے و انت اس کہ مقبوضہ کشمیر اٹی مننگ ءِ اوڑا بایدے سخت نظر شاغنگے انتئے کہ اسہ تو دا اسہ سنگین ءُ انسانی چیلنج اسے و ارٹ میکو دا امن و سلامتی کن سنگین گڑتی اسے۔ پاکستان سفیر پارے کہ داہیت اٹی ہچ ءُ شک اس اف کہ نن پہل کپنہ ولے اگہ ننا وت واجہی ءِ وڑانا وڑاسے ٹی چیلنج کننگ یا پاکستان کن خطرہ ودی کننگ نا کوشست کننگا تو نن پبی ورندی ایتنہ۔ وال سٹریٹ جرنل دابابت تینا تران اٹی پارے کہ پاکستان مہالو آن جہانی برادری ءِ خبڑدار کرینے کہ مقبوضہ کشمیر نا سنگین حالیت جوہری سلہہ غاتیان ہمپوک اِرا ہمسایہ ملک آتا نیام اٹ جنگ انا سوب مننگ کیک۔ اخبار پارے کہ پاکستانی کمامدارآک بھارتی حکومت نا کنڈآن مقبوضہ کشمیر نا خصوصی حیثیت نا چٹفنگ آن پد پنچ اگست آن جاری لاک ڈاؤن و ہموڑے برجا ایلو بھارتی گام گیج آتیان دنیا ءِ معلومدار کننگ نا کوشست کننگ ءِ۔ اخبار مستی پارے کہ بھارت مقبوضہ کشمیر نا بابت تینا ساڑی آ گام گیج ءِ ہرانا رداٹ سد آ کشمیری سیاسی راہشون، سیاسی کارندہ، پوریاگر، طالب علم و استاد آتے دزگیر یا اُراتیٹی نظر بند کننگانے، تینا تہہ نا معاملہ اس گوندک ولے حق انسانی نا رکھ اکن کاریم کروک آ جہانی ادارہ بھارتی گام گیج نا مذمت ءِ کرینے و مقبوضہ کشمیر نا حالیت آتیا سجفنگ کن اقوام متحدہ نا سلامتی کونسل نا بند کمرہ دیوان اس ہم اڈ ہلکونے۔
