کوءٹہ ۔ 27 اگست (اے پی پی) ڈائریکٹر جنرل قومی احتساب بیورو بلوچستان فرمان اللہ پنچ شنبے نادے 29 اگست آ پیشیم نا 2 بجہ غان 3بجہ نا نیام اٹ وڈی خوری نا بابت السی غاو تا بِننگ کن کھلی کچہری اس خلیک ، وڈی خوری نا پیدواری ءِ کروک آ یا زہمی بندغ وڈی خوری نا بابت معلومداری یا غاو پورو شاہدی اتون نیب انا ریجنل آفس اٹی ڈی جی نیب انا مون آ پیش کننگ کیک ، نیب انا کانود 1999نا دنگ اٹ بروک آ غٹ غاوتیا کانود نا رداٹ کارروائی کننگک ۔ الس نا راہشونی کن معلومدار کننگ کہ ہندن ءُ ڈوہ ہرا نیب انا دنگ اٹ بریرہ دُن کہ سرکاری خزانہ ءِ بندغ اس یا ادارہ سے نا کنڈآن نسخان تننگ ، سرکاری واک آتے غلط کاریم اٹ اتسا مالی فائدہ دوئی کننگ، الس تون درو کننگ، بینک ، مالیاتی ادارہ و حکومتی سلوک آ پیسہ غاتا دانستہ عدم ادائیگی نا ارتکاب کننگ یا السی عہدیدار و سرکاری ملازم تینا مالی وسیلہ غاتیان بڑزکو زند اس تیر کننگ و ناروا میرات جوڑ کننگ، دُن انگا غٹ غاوتیا دمدستی گام گیج چست کننگک ولے سائل آتے پاننگانے کہ کھلی کچہری ٹی جندی وڑنا ویل آتے اتنگ نا جاگہ غا الس تون درو کننگ نا بابت کیس آتون اوار سرکاری خزانہ ءِ پلوک آ عنصر آتا پیدواری ءِ کننگے ۔ کھلی کچہری ءِ اڈتننگ چیئرمین نیب جسٹس جاوید اقبال نا خصوصی پارت آ غٹ ریجنل آفس آتے ٹی ہر تُو انا آخیریکو پنچ شنبے آ کننگک ۔
