بھارت نا کنڈآن ریاستی جبر انا کمک اٹ کشمیری تا توار ءِ توننگ داسہ ناممکن ءِ
اسلام آباد ۔ 27 اگست (اے پی پی) وزیراعظم عمران خان نا خصوصی کمکار حوالکاری و شینکاری فردوس عاشق اعوان پارینے کہ بھارت نا کنڈآن ریاستی جبر انا کمک اٹ کشمیری تا توار ءِ توننگ داسہ ناممکن ءِ ۔ پاکستان کشمیر نا ویل انا ایسری کن ہر آپشن ءِ کاریم اٹ اتیک، حکومت خواہک کشمیر کاز آ مچ آ قوم و سیاسی سرکڑدہ غاک اسہ زبان مریر، اگہ جنگ مسلط کننگا تو پاک فوج داڑکن تیار ءِ ولے دا جنگ بیرہ دا ڈیہہ نا امن کن خطرہ اس مفک بلکن مچ آ دنیا اونا پلویڑ اٹی بریک، داکان مست کہ ہرے مرے دنیا بھارت نا دا جابرانہ گام گیج ءِ تورے ۔ نجی ٹی وی نا پروگرام اسے ٹی گپ و تران اٹی خصوصی کمکار پارے کہ نن دنیا ءِ نئے بیرہ دا باور کرفنہ بلکن وزیراعظم عمران خان نا کماشی ٹی ساڑی حکومت داڑتون دستیاب غٹ آپشن تے کاریم اٹ اتیک و بھارت نا مکروہ چہرہ ءِ دنیا نا مون آ پاش کیک ۔ ہندن ہندن دا بیانیہ دنیا اسکان سرمریک ، بھارت کن زیات وخت اسکان کشمیر نا تہہ ٹی جبر، استحصال ، فوج و کرفیو نا کمک اٹ کشمیری تا توار ءِ توننگ مشکل مریک و با الآخر دا جہانی دباءو و میڈیا ٹی انسانی حق انا خلاف ورزی تے تالان کننگ دنیا ءِ مجبور کیک کہ او مودی نا جبر آن کشمیری تے نجات ترفنگ کن سلامتی کونسل نا قرارداد آتیا عملدرآمد ءِ المی کے و کشمیری تے اوفتا حق خودارادیت ایتے ۔ اپوزیشن تون سلابت نا بابت سوج آ خصوصی کمکار پارے کہ حکومت خواہک کہ کشمیر کاز آ نن غٹ اسہ زبان مرسا پورو ہم گرنچی و یکجہتی اٹ دنیا ءِ مظلوم کشمیری تتون سلوک نظر برین، دابابت اپوزیشن نا کڑد ءِ امنا کرسا اسہ پڑک اس جوڑ کننگانے، مسلم لیگ (ن) نا کنڈآن مشاہد حسین سید وپاکستان پیپلزپارٹی نا کنڈآن سید نوید قمر داپڑک نا بشخ ءُ ، دا بابت ننا میٹنگ ہم مسنے ہراٹی اوفک دا بابت تینا نقطہ نظر ءِ ہم تسنو ۔ اسہ سوج اسے آ او پارے کہ پاکستان مظلوم کشمیری تتون سلوک ءِ و دا ویل انا ایسری کن او ہر حد اسکان کاہک و ہر آپشن ءِ کاریم اٹ اتیک ۔ ڈاکٹر فردوس عاشق اعوان پارے کہ اگہ جنگ ءِ مسلط کننگا تو پاک فوج داڑکن تیار ءِ ولے چونکہ 2ایٹمی واکدار آتا نیام اٹ کشمیر اسہ فلیش پوائنٹ اسے ہنداخاطران دا جنگ بیرہ دا ڈیہہ نا امن کن خطرہ اس مفک بلکن مچ آ دنیا اونا پلویڑ اٹی بریک ۔ داکان مست کہ ہرے مرے و بھارت نا اسہ کنڈی ، مکروہ و سیاہ عمل دنیا نا امن ءِ خطرہ ٹی بٹے، دنیا بھارت نا دا جابرانہ گام گیج ءِ تورے و مظلوم کشمیری تتون مروک آ نا انصافی و استحصال ءِ چٹفنگ اٹ تینا کڑد ءِ ادا کے ۔
